Satara ZP Election : मकरंदआबांसोबत जिल्हा परिषदेचं प्लॅनिंग केलेला नेता भाजपमध्ये : मंत्री जयकुमार गोरेंनी बिघडवलं राष्ट्रवादीचं गणित

Satara ZP Election : सातारा जिल्हा परिषद निवडणुकीच्या पार्श्वभूमीवर खंडाळा तालुक्याचे राष्ट्रवादीचे ज्येष्ठ नेते आणि जिल्हा परिषदेचे माजी उपाध्यक्ष नितीन भरगुडे-पाटील यांनी भाजपमध्ये जाहीर प्रवेश केला. सातारा येथे ग्रामविकासमंत्री जयकुमार गोरे यांच्या उपस्थितीत त्यांच्या पक्षप्रवेशाचा कार्यक्रम पार पडला. या प्रवेशानंतर मदत व पुनर्वसनमंत्री मकरंद पाटील यांना मोठा धक्का बसला बसल्याचे बोलले जाते.

नितीन भरगुडे-पाटील यांची ओळख राष्ट्रवादी काँग्रेसची ‘मुलूखमैदानी तोफ’ म्हणून राहिली आहे. जिल्हा परिषद आणि पंचायत समितीच्या माध्यमातून गेल्या चार दशकांपासून त्यांनी खंडाळा तालुक्याच्या राजकारणात सक्रिय सहभाग घेतला आहे. मकरंद पाटील यांनी भरगुडे पाटील यांच्यासोबतच बसून वाई विधानसभा मतदारसंघातील जिल्हा परिषद गटांचं सगळं नियोजन केले होते.

2017 च्या जिल्हा परिषद निवडणुकीत शिरवळ गटातून नितीन भरगुडे-पाटील यांना पराभवाचा सामना करावा लागला होता. त्यावेळी त्यांचे प्रतिस्पर्धी उदय कबुले यांनी अपक्ष म्हणून बाजी मारली होती. अनुभवी नेत्याने निवडणुकीच्या तोंडावर राष्ट्रवादीची साथ सोडून भाजपची वाट धरल्याने तालुक्यातील गणिते बदलण्याची शक्यता आहे.

सत्तेसाठी नाही, तर दिवंगत लक्षणराव भरगुडे- पाटील यांचे अनेक वर्षे अपुरे राहिलेले स्वप्न पूर्ण करण्यासाठी व जनतेच्या हिताच्या कामासाठी भाजपमध्ये काम करण्याचे ठरवले आहे. असे नितीन भरगुडे-पाटील यांनी सांगितले.

पक्षांतराचे सत्र सुरूच

खंडाळा तालुक्यात केवळ भरगुडे-पाटीलच नव्हे, तर इतरही अनेक दिग्गज नेत्यांनी पक्षबदल केला आहे. दोन दिवसांपूर्वीच तालुक्याचे माजी सभापती आणि तालुका काँग्रेसचे माजी अध्यक्ष प्रा. एस. वाय. पवार, राष्ट्रवादी शरदचंद्र पवार पक्षाचे डॉ. नितीन सावंत यांनी भाजपमध्ये प्रवेश केला. दुसरीकडे, काँग्रेसचे माजी सभापती आणि शिरवळचे गुरुदेव बरदाडे यांनी राष्ट्रवादी काँग्रेसमध्ये प्रवेश केला आहे. या दिग्गज नेत्यांच्या पक्षांतरामुळे खंडाळा तालुक्यातील आगामी स्थानिक स्वराज्य संस्थांच्या निवडणुका अत्यंत चुरशीच्या आणि रंजक होणार असल्याचे स्पष्ट झाले आहे.