चुकीच्या व्यवस्थापनामुळे 'किसन वीर' कारखाना अडचणीत...मकरंद पाटील

सातारा : चुकीचे व्‍यवस्‍थापन आणि मनमानी कारभारामुळे किसन वीर सहकारी साखर कारखाना अडचणीत आला आहे. कारखान्‍यावर कर्जाचा डोंगर असून, यंदाचा हंगाम न झाल्‍याने लाखो टन ऊस शेतातच पडून आहे. निवडणुकीच्‍या माध्‍यमातून हा कारखाना शेतकरी आमच्‍या ताब्‍यात देतील. 'किसन वीर'सह प्रतापगड आणि खंडाळा कारखानाही आम्‍ही पूर्ण ताकदीने चालवू, असा विश्‍‍वास वाईचे राष्ट्रवादीचे आमदार मकरंद पाटील यांनी व्‍यक्‍त केला.

किसन वीर सहकारी साखर कारखान्‍याच्‍या संचालक मं‍डळाच्या कार्यक्षेत्रातील पाच तालुक्‍यांतील समविचारी लोकांनी एकत्र येत किसन वीर शेतकरी बचाव पॅनेलची स्‍थापना केली आहे. या पॅनेलची भूमिका मांडण्‍यासाठी आयोजित पत्रकार परिषदेत श्री. पाटील बोलत होते. या वेळी जिल्‍हा बँकेचे अध्‍यक्ष नितीन पाटील, पॅनेलचे पदाधिकारी बाबासाहेब कदम उपस्‍थित होते.

श्री. पाटील म्‍हणाले,‘‘ चुकीच्‍या व्‍यवस्‍थापनामुळे कारखान्‍यावर आजमितीला एक हजार कोटींचे कर्ज आहे. कर्ज जागेवर असून, कारखान्‍यात साखरेचे एक पोतेही शिल्‍लक नाही. तोट्यात असणाऱ्या या कारखान्‍याला कोणीही कर्ज देण्‍यास तयार नसल्‍याने यंदाचा हंगाम सुरू झाला नाही. कार्यक्षेत्रातील ऊस सहकारमंत्री बाळासाहेब पाटील यांच्‍या पुढाकाराने इतर कारखान्‍यांनी नेला असला तरी आजमितीला ५ लाख टन ऊस शेतातच पडून आहे.

किसन वीर यांनी उभारलेला कारखाना टिकावा, यासाठी इच्‍छा नसतानाही आम्‍ही या निवडणुकीला सामोरे जात आहोत. हा कारखाना यापुढील काळात सभासदांच्‍याच मालकीचा राहील, असा आम्‍ही शेतकऱ्यांना विश्‍‍वास दिला असून, त्‍यांच्‍या पाठिंब्‍यावरच आम्‍ही ही निवडणूक जिंकू.’’ अपहार, गैरव्‍यवस्‍थापनामुळेच कारखाना कर्जबाजारी झाल्‍याचा आरोपही या वेळी नितीन पाटील यांनी केला.

ती भेट दिशाभूल करणारी....

निवडणूक सुरू असतानाच मदन भोसले यांनी केंद्रीय सहकारमंत्री अमित शहा यांची भेट घेतल्‍याबाबत नितीन पाटील म्‍हणाले,‘‘ मुळात कारखाना तोट्यात आहे. त्‍याच्‍यावर एक हजार कोटींचे कर्ज आहे. असे असतानाही त्यांनी श्री. शहा यांची भेट घेत एनसीपीसीकडून मदत मागितल्‍याचे सांगितले जात आहे. मुळात तसे कर्ज एनसीपीसी देवूच शकणार नाही. ही भेट म्‍हणजे निव्‍वळ शेतकरी, सभासदांची दिशाभूल करणारी असून, ते नाटक आहे.’’