Gokul Milk Election: गोकुळ दूध संघाच्या राजकारणाला पुन्हा 'उकळी' फुटली! एका रात्रीत अधिकाऱ्याची उचलबांगडी

Kolhapur News:कोल्हापूर जिल्हा सहकारी दूध उत्पादक संघ अर्थात गोकुळ दूध संघाच्या राजकारणाला पुन्हा एकदा 'उकळी' फुटली आहे. गेल्या अनेक दिवसांपासून गोकुळ दूध संघाच्या विविध प्रकरणे आणि तक्रारीतील अभ्यास असणाऱ्या दुग्ध विभागातील सहायक निबंधक (दुग्ध) प्रदीप मालगावे यांना पदावरून बुधवारी रात्री तडकाफडकी हलवण्यात आले.

रात्री उशिरा सावंतवाडी सहाय्यक निबंधक सुजय कदम यांची नियुक्ती करण्यात आली आहे. गेले महिना-दीड महिन्यापासून गोकुळच्या संस्था अवसायन प्रकरण चांगले गाजत असतानाच ही बदली झाल्याने खळबळ उडाली आहे.

गोकुळ दूध संघाची निवडणूक प्रक्रिया सुरू आहे. या निवडणुकीच्या पार्श्वभूमीवर बाराशे सभासदांचा विषय ऐरणीवर आहे. यंदा गोकुळ दूध संघाच्या निवडणुकीसाठी 5470 सभासदांची यादी दुग्ध विभागाकडे पाठवण्यात आली होती. मात्र या यादीतील बाराशे सभासद बेकायदेशीर आणि संसद असल्याची तक्रार दुग्ध निबंधक विभागीय पुणे कार्यालयाकडे प्राप्त झाली आहे. पाठवलेल्या यादीवर एका दूध संस्था संचालकांनी हरकत घेतल्याने ठराव मागवण्याची प्रक्रिया स्थगित झाली होती.

बुधवारी रात्री उशिरा मालगावे यांच्या बदलीचे आदेश काढण्यात आले. त्यांच्या ठिकाणी सावंतवाडीचे सहायक निबंधक सुजय कदम यांना तातडीने हजर राहण्याचे आदेश देण्यात आले. पण, मालगावे यांच्या बदलीचे ठिकाण निश्चित केलेले नाही. त्याबाबतचा आदेश स्वतंत्र काढण्यात येणार आहे. मात्र अद्याप मालगावे यांच्या बाबत अध्यादेश न निघाल्यामुळे ते या पदावर सध्या तरी असणार आहेत. शिवाय आज गोकुळ संदर्भात महत्त्वाची सुनावणी असल्याने मालगावे सुनावणीसाठी हजर राहणार आहेत.

दरम्यान, निवडणूक लागल्यास बाराशे संस्था सभासदांची पात्रता किंवा अपात्रता निश्चित झालेली नाही. मात्र याबाबत निर्णय होऊनच गोकुळ दूध संघाच्या निवडणूक लागाव्यात अशी भूमिका गोकुळच्या संचालिका शौमिका महाडिक यांनी घेतली आहे. त्यांनी थेट मुंबई उच्च न्यायालय यांचे कोल्हापूर सर्किट बेंच येथे धाव घेतली आहे. त्यांच्या याचिकेवर अद्याप निर्णय झालेला नाही, त्यामुळे निवडणूका लांबणीवर पडण्याची शक्यता आहे.