कोल्हापूर जिल्हा दूध उत्पादक संघ अर्थात गोकुळ दूध संघात मागच्या 24 तासात घडलेल्या प्रचंड नाट्यमय घडामोडींनंतर अध्यक्षपदाची धुरा अखेर वैद्यकीय शिक्षण मंत्री हसन मुश्रीफ यांचे चिरंजीव नविद मुश्रीफ यांच्याकडे आली आहे. अध्यक्षपदासाठी चर्चेत असलेली सर्व नावे मागे पडून आज (शुक्रवारी) सकाळी नविद मुश्रीफ यांच्या नावावर शिक्कामोर्तब झाले.
या निवडीनंतर आता कोल्हापूर जिल्ह्याच्या राजकीय आणि आर्थिक नाड्या मुश्रीफ पिता-पुत्राच्या हाती एकवटल्या आहेत. आतापर्यंत मुश्रीफ गट हा केवळ कागल पुरताच मर्यादित असल्याचा आरोप विरोधकांनी केला होता. पण या निवडीनंतर जिल्ह्यातील राजकारणात आणि सहकारात 'मुश्रीफराज' सुरू झाले आहे.
मंत्री हसन मुश्रीफ हे गेल्या 10 वर्षापासून कोल्हापूर जिल्हा सहकारी बँकेचे अध्यक्ष पद सांभाळत आहेत. जिल्ह्याचे आर्थिक केंद्र असलेल्या जिल्हा सहकारी बँकेची वाटचाल यशस्वी राहिली आहे. जिल्ह्यातील सर्व पक्षाच्या नेत्यांना एकत्र घेत सहकारातील अग्रगण्य बँक म्हणून कोल्हापूर जिल्हा बँकेची ओळख निर्माण केली.
याच बँकेच्या माध्यमातून त्यांनी विधानसभा निवडणुकीपूर्वी मतदारसंघातील आणखीही मजबूत केली होती. यानंतर आता कोल्हापूचे राजकारणाचे प्रमुख केंद्र असलेल्या गोकुळ दूध संघाच्या अध्यक्षपदावरही मुश्रीफ यांच्या मुलाची निवड झाली आहे. त्यामुळे जिल्ह्याचे पालकमंत्रीपद नसले तरी राजकारणात मुश्रीफ यांचेच वर्चस्व राहणार आहे.
गोकुळ दूध संघाच्या अध्यक्ष निवडीत सुरुवातीपासूनच गोंधळ उडाला होता. अरुण डोंगळे यांनी राजीनामा देऊ नये यासाठी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांच्या पातळीवरून प्रयत्न झाले. पण मुश्रीफ आणि काँग्रेस आमदार सतेज पाटील यांच्या दबावापुढे डोंगळे यांनी नमते घेतले.
डोंगळे यांच्या राजीनाम्यानंतर सर्वानुमते शशिकांत पाटील चुयेकर यांचे नाव अंतिम झाले होते. मात्र गोकुळ दूध संघावर महायुतीचाच अध्यक्ष असावा असा दबाव पुन्हा मुख्यमंत्री देवेंद्र फडणवीस यांनी टाकला. त्यामुळे हसन मुश्रीफ यांनी गुरुवारी संध्याकाळीच कोल्हापूर गाठले. आमदार सतेज पाटील, विनय कोरे या नेत्यांशी आणि गोकुळच्या सत्ताधारी संचालकांच्या मॅरेथॉन बैठका घेतल्या.
या बैठकांमध्ये चुयेकर यांचे नाव मागे पडले. त्यानंतर अजित नरके, अमरीशसिंह घाटगे आणि नविद मुश्रीफ या तिघांची नावे चर्चेत आली. पण नरके आणि घाटगे यांच्या नावाला काही नेत्यांचा विरोध झाला. शिवाय घाटगे हे विरोधी पॅनल मधून निवडून आल्याने त्यांची अडचण निर्माण झाली. त्यामुळे नविद मुश्रीफ यांचे नाव शिल्लक राहिले.
पण हसन मुश्रीफ हे नविद यांना गोकुळचे अध्यक्ष पद येण्यास सहमत नव्हते. कोल्हापूर जिल्हा सहकारी बँकेचे अध्यक्ष पद, गोकुळ दूध संघाचे अध्यक्ष पद या दोन मोठ्या सहकारी संस्थेचे अध्यक्षपद एकाच घरात नको अशी भूमिका मंत्री मुश्रीफ यांची होती. मात्र मुख्यमंत्री देवेंद्र फडणवीस यांच्या दबावानंतर ते मुलाला अध्यक्षपद देण्यास राजी झाल्याची समजते.
या निवडीनंतर मुश्रीफ गटाला केवळ तालुकाच नव्हे तर जिल्ह्यात राजकीय बळ मिळाले आहे. त्यामुळे जिल्ह्यातील राजकारणावर मुश्रीफ गटाची पकड आणखी मजबूत होणार आहे. शिवाय राष्ट्रवादीला तालुक्यापुरतेच मर्यादित ठेवले असा विरोधक आणि स्वपक्षातूनही होणारा आरोपही खोडून काढण्याची संधी मुश्रीफ यांना आहे.
आगामी स्थानिक स्वराज्य संस्थेच्या निवडणुकीत आणि गोकुळच्या पंचवार्षिक निवडणुकीत मुश्रीफ गटाची भूमिका महत्त्वाची असणार आहे. जिल्ह्यातील गावागावात जोडण्या लावण्यासाठी गोकुळ दूध संघातील अध्यक्षपद महत्त्वाचे आहे. त्याचा उपयोग कसा करायचा? हे मुश्रीफ गटाला चांगलेच माहिती आहे. त्यामुळे याच फायदा मुश्रीफ गटाला नक्की होणार आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.