Kolhapur Mahapalika Election : कोल्हापुरात आजी-माजी आमदारांचे पुत्र महापालिकेच्या रिंगणात : शिवसेनेकडून दोघांचीही उमेदवारी फायनल

Kolhapur News : कोल्हापूर महानगरपालिकेच्या रिंगणात आजी-माजी आमदार पुत्रांची उमेदवारी जवळपास अंतिम झाली आहे. कोल्हापूर उत्तरचे आमदार, राज्य नियोजन मंडळाचे अध्यक्ष राजेश क्षीरसागर यांचे पुत्र ऋतुराज शिरसागर आणि दिवंगत आमदार चंद्रकांत जाधव, माजी आमदार जयश्री जाधव यांचे पुत्र सत्यजित जाधव हे निवडणुकीच्या रिंगणात उतरणार आहेत. शिवसेनेकडून या दोघांचीही उमेदवारी निश्चित मानली जाते.

राज्य नियोजन मंडळाचे अध्यक्ष राजेश क्षीरसागर यांचे पुत्र ऋतुराज क्षीरसागर यांनी अनेक दिवसांपूर्वीच महापालिका निवडणुकीची तयारी केली होती. निवडणुकीची घोषणा झाल्यानंतर त्यांची प्रचारात आघाडी दिसू येते. प्रभाग क्रमांक 7 मधून त्यांची उमेदवारी शिवसेनेकडून निश्चित मानली जात आहे.

तर दुसरीकडे प्रभाग क्रमांक 18 मधून दिवंगत आमदार चंद्रकांत जाधव आणि माजी आमदार जयश्री जाधव यांचे चिरंजीव सत्यजित जाधव यांची सर्वसाधारण गटातून उमेदवारी निश्चित मानली जात आहे. काल रात्री उशिरापर्यंत या नावावर चर्चा करण्यात आली. त्यानंतर प्रभाग क्रमांक 18 मधून सत्यजित जाधव हे निवडणुकीच्या रिंगणात उतरणार असल्याचे निश्चित झाले आहे.

2019 च्या निवडणुकीत दिवंगत आमदार चंद्रकांत जाधव हे काँग्रेस मधून आमदार झाले. मात्र दोनच वर्षात त्यांचे निधन झाले. नंतर झालेल्या पोटनिवडणुकीत त्यांच्या पत्नी जयश्री जाधव या काँग्रेसमधून आमदार झाल्या. 2024 च्या विधानसभा निवडणुकीत मात्र राज्यातील परिस्थिती बदलली तशी कोल्हापूर शहरातील परिस्थिती बदलली.

माजी आमदार जयश्री जाधव यांनी शिवसेनेत प्रवेश केला. आता महानगरपालिका निवडणुकीत जाधव यांच्या घरातील उमेदवार असावेत अशी कार्यकर्त्यांची इच्छा आहे. त्यासाठी स्थानिक नेत्यांवर कार्यकर्त्यांनी दबाव वाढवला. रात्री उशिरा त्यावर चर्चा झाल्यानंतर जाधव यांच्या उमेदवारीवर निर्णय घेतल्याचे समजते.