Keshavrao Bhosale Theater Fire: केशवराव भोसले नाट्यगृहाच्या दुरुस्तीसाठी मुख्यमंत्री शिंदेकडून १० कोटी

Kolhapur News : कोल्हापूर आणि कोल्हापुरातील कलाकारांचा आत्मा असणारा आणि पैलवानांचा हक्काचं मैदान असणार खासबाग मैदान आणि संगीत सूर्य केशवराव भोसले नाट्यगृह (Keshavrao Bhosale Theater Fire) काल रात्री आगीत भस्मसात झाले. त्यामुळे कोल्हापुरच्या सांस्कृतिक ठेवा असणारा कलामंच आगीच्या भस्मस्थानी जळताना कोल्हापूरकरांना अश्रू अनावर झाले.

संगीतसूर्य केशवराव भोसले नाट्यगृह वास्तूची बांधणी स्वतः छत्रपती शाहू महाराजांच्या पुढाकारानेच झाली. या वास्तूत संगीत, नाट्य कलेची बीजेदेखील रुजली गेली. आज अचानक लागलेल्या आगीने कोल्हापूरची अस्मिता आगीच्या खाईत लोटलेली पाहणे दुर्दैवी आहे. पण या वास्तूच्या पुन:उभारणी साठी तात्काळ १० कोटींचा निधी मंजूर करण्यात आला असल्याची माहिती राज्य नियोजन मंडळाचे कार्यकारी अध्यक्ष राजेश क्षीरसागर यांनी दिली.

आमदार सतेज पाटील, अजून नियोजन मंडळाचे अध्यक्ष माजी आमदार राजेश क्षीरसागर, माजी आमदार अमल महाडिक यांनी घटनास्थळी तातडीने धाव घेत आवश्यक सूचना उपस्थित जिल्हाधिकारी अमोल येडगे, आयुक्त के. मंजुलक्ष्मी यांच्यासह प्रशासनास दिल्या. राजेश क्षीरसागर यांनी आग आटोक्यात आणण्यासाठी तात्काळ टर्न टेबल लॅडर, विमानतळ प्रशासनाचे अग्निशमन वाहन पाचारण करून रात्री बारा वाजण्याच्या सुमारास ही आग आटोक्यात आणली.

घटनेबाबत मुख्यमंत्री एकनाथ शिंदे (Eknath Shinde) यांनी परिस्थिती आणि वस्तुस्थितीचा आढावा घेतला. मुख्यमंत्री एकनाथ शिंदे यांनी १० कोटी रुपयांचा निधी जाहीर केला असल्याची माहिती राजेश क्षीरसागर यांनी दिली. संपूर्ण नुकसानीची माहिती घेता अंदाजे ५० कोटींचे नुकसान झाल्याचे दिसते. सरकारकडून १० कोटींची मदत तात्काळ मंजूर करण्यात आली आहे, असे क्षीरसागर यांनी सांगितले.

अचानक लागलेल्या आगीने ऐतिहासिक वास्तू डोळ्यासमोर जळणे ही गोष्ट दुर्दैवी आहे. सरकार या वास्तूच्या पुनः उभारणीसाठी आवश्यक सर्व ती मदत करेल. यासह कोल्हापूर जिल्ह्यातील सर्वच लोकप्रतिनिधी यांनी आपल्या आमदार, खासदार फंडातून निधी देवून कोल्हापूरची अस्मिता पुन्हा उभी करण्यासाठी सहकार्य करण्याचे आवाहनही त्यांनी यावेळी केले.