Mahayuti Politics : 'आता घड्याळाची वेळ चांगली नाही, इकडे तिकडे बघू नका...'; शिवेंद्रराजेंनी अजितदादांच्या राष्ट्रवादीला डिवचलं

Satara News, 28 Nov : स्थानिक स्वराज्य संस्थांच्या निवडणुकीच्या पार्श्वभूमीवर राज्यातील राजकीय वातावरण तापलं असून सर्वपक्षीय नेत्यांना प्रचाराचा जोरदार धडाका लावला आहे. शिवाय राज्यातील महायुती आणि महाविकास आघाडीती मित्रपक्ष देखील या निवडणुकीत एकमेकांविरोधात मैदानात उतरले आहेत.

त्यामुळे राज्यात सत्तेत एकत्र असलेले मित्रपक्ष आता एकमेकांवर आरोप-प्रत्यारोप करताना दिसत आहेत. अशातच आता भाजप नेते तथा राज्याचे सार्वजनिक बांधकाम मंत्री शिवेंद्रराजे भोसले यांनी उपमुख्यमंत्री अजित पवार यांच्या राष्ट्रवादीवाला उद्देशून आता घड्याळाची वेळ चांगली नाही असं वक्तव्य केलं आहे.

त्यांच्या या वक्तव्यामुळे विविध चर्चांना उधाण आलं आहे. शिवेंद्रराजे रहिमतपूर नगरपालिकेच्या प्रचारार्थ आयोजित सभेत बोलत होते. यावेळी ते म्हणाले, 'आपलं चिन्ह कमळ आहे. आता घड्याळाची वेळ चांगली नाही त्यामुळे इकडे तिकडे बघू नका. हातातलं घड्याळ वेगळं आणि चिन्हाचे वेगळं आहे.

सर्वांनी विचार करा आणि भाजपचे उमेदवार निवडून द्या', असं म्हणत त्यांनी भाजप उमेदवारांना मतदान करा असं आवाहन देखील केलं. मात्र, आता शिवेंद्रराजे भोसलेंनी केलेल्या वक्तव्यामुळे राष्ट्रवादी आणि भाजपमध्ये नवा वाद सुरू होण्याची शक्यता नाकारता येत नाही.

कारण आधीच भाजप आणि राष्ट्रवादीतील नेत्यांमध्ये नीधी वाटपावरून आरोप-प्रत्यारोप सुरू आहेत. राज्याच्या तिजोरीच्या चाव्या अजितदादांकडे असल्या तरी तिजोरीचा मालक आमचा आहे, असं वक्तव्य भाजप नेत्यांनी केलं होतं. त्यावरून बराच वाद निर्माण झाला होता. अशातच आता शिवेंद्रराजेंनी घड्याळाची वेळ चांगली नसल्याचं वक्तव्य केल्यामुळे अनेक तर्त-वितर्क लावले जात आहेत.