Fadnavis, Shinde & Pawar : फडणवीस, शिंदे आणि दादांचं ठरलं.., पायात पाय घालायचे नाही, पाडायचे तर पुढच्याला पाडू

Pune News : विधानसभा निवडणुकीनंतर आगामी स्थानिक स्वराज्य संस्थांच्या निवडणुकांसाठी सर्वच राजकीय पक्ष तयारी लागले आहेत. पक्ष वाढवण्याच्या दृष्टिकोनातून संघटनात्मक बांधणी आणि पक्षप्रवेशाचा धडाका सध्या राजकीय पक्षांनी लावल्याचं पाहायला मिळत आहे.

महायुतीतील तिन्ही पक्षांकडे सध्या पक्षप्रवेशासाठी मोठ्या प्रमाणात वेटिंग लिस्ट असल्याचं पाहायला मिळत आहे. स्थानिक स्वराज्य संस्थांच्या निवडणुकीच्या पार्श्वभूमीवर होत असलेल्या पक्षप्रवेशाबाबत महायुतीतील तिन्ही पक्षातील वरिष्ठ नेत्यांनी महत्त्वाचा निर्णय घेतला आहे. नुकतीच याबाबत मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांच्यात बैठक झाली या बैठकीमध्ये पक्षप्रवेशाबाबत काही गोष्टी तिन्ही पक्षांनी पाळण्याबाबत या नेत्यांमध्ये एकमत झाला असल्याचं सांगितलं जात आहे.

शिंदेंच्या शिवसेनेकडून गेल्या काही दिवसांपासून ऑपरेशन टायगर सुरू असल्याचे सांगितलं जात आहे. या माध्यमातून ठाकरेंच्या शिवसेनेतील अनेक नेते आपल्याकडे वळून घेऊन त्यांचे पक्ष प्रवेश करण्यात येणार असल्याचं मंत्री उदय सामंत यांनी सांगितला आहे. शिवसेनेमध्ये प्रवेश करणाऱ्यांची लिस्ट देखील गेल्या काही दिवसांपासून माध्यमांमध्ये चर्चेत आहे.

ज्यापद्धतीने शिंदेंच्या शिवसेनेमध्ये पक्षप्रवेश सुरू आहेत. तसेच पक्षप्रवेश भाजप आणि राष्ट्रवादी काँग्रेसमध्ये देखील होताना पाहायला मिळत आहेत. नुकताच पुणे शहरातील ठाकरे गटाचे पाच माजी नगरसेवकांनी भाजपमध्ये प्रवेश केला. तसेच आगामी महापालिका निवडणुकीच्या पार्श्वभूमीवर शरद पवारांच्या राष्ट्रवादी मध्ये असलेले काही नेते अजित पवारांच्या संपर्कात असल्याचे देखील सांगण्यात येत आहे. त्यामुळे अजित पवार यांच्या राष्ट्रवादीकडे देखील आगामी महापालिका निवडणुकीच्या पार्श्वभूमी वर मोठ्या प्रमाणात पक्ष प्रवेश होण्याची शक्यता आहे.

याबाबत तीन वरिष्ठ नेत्यांची मुंबईमध्ये बैठक झाली या बैठकीमध्ये आगामी काळात पक्ष प्रवेश देताना महायुतीतील मित्र पक्षांनी एकमेकांच्या पक्षातील नेत्यांना आणि कार्यकर्त्यांना प्रवेश न देण्याचा निर्णय घेतला आहे. त्यामुळे आगामी काळामध्ये महायुतीतील पक्षांमधील नेत्यांचे प्रवेश हे इतरमित्रात पक्षांमध्ये होताना पाहायला मिळणार नाहीत. मात्र विरोधी पक्षातील नेत्यांचा पक्षात प्रवेश केल्यास आगामी स्थानिक स्वराज्य संस्थेच्या निवडणुकीसाठी महायुती आणखीन मजबूत होईल. त्यामुळे प्रवेश घडून आणायचे असतील तर विरोधी पक्षातील चांगल्या नेत्यांचे प्रवेश घडून आणावेत अशी देखील चर्चा या नेत्यांच्या बैठकीत झाली असल्याचं सांगितलं जात आहे.

भुजबळांच्या भाजप प्रवेशाला पूर्णविराम

मंत्रिमंडळातून डाव आल्यानंतर छगन भुजबळ हे अजित पवार आणि त्यांच्या राष्ट्रवादीवर नाराज असल्याचे वारंवार दिसून आला आहे. त्यासोबतच छगन भुजबळ हे राष्ट्रवादीवर नाराज झाल्यानंतर त्यांची भाजपची जवळीक सुद्धा काही लपून राहिलेली नाही. देवेंद्र फडणवीस यांना आपण मंत्रिमंडळात हवे होतो असं छगन भुजबळ यांनी जाहीरपणे सांगितलं होतं.

त्यानंतर केंद्रीय गृहमंत्री अमित शाह हे नाशिक दौऱ्यावर असताना छगन भुजबळ हे अमित शाह यांच्या शेजारी बसून बराच वेळ त्यांच्याशी चर्चा करत होते. इतकंच नाही तर राष्ट्रवादी काँग्रेसच्या शिर्डी येथे झालेल्या शिबिरात आपण फक्त प्रफुल पटेल यांच्या विनंती खातीर भेट देऊन जात असल्याचं सांगून त्यांनी आपली नाराजी जाहीर रित्या बोलून दाखवली होती. त्यामुळे एकीकडे राष्ट्रवादी काँग्रेसवर प्रचंड नाराज आहे आणि दुसरीकडे भाजपची असणारी जवळीक पाहता छगन भुजबळ हे भाजपमध्ये प्रवेश करतील असा चर्चा जोर धरू लागल्या होत्या.