Manoj Jarange Patil : मनोज जरांगेंच्या सभेत घुसून चोरी; असा पकडला अट्टल गुन्हेगार

Ahmednagar News : मनोज जरांगे यांच्या सभेत सोन्याच्या दागिन्यांची चोरी करणाऱ्या पाथर्डीतील अट्टल गुन्हेगाराला स्थानिक गुन्हे शाखा पोलिसांनी अटक केली आहे. अमोल बाबासाहेब गीते (वय २६, रा. लोहसर खांडगाव, ता. पाथर्डी) असे अटक केलेल्या चोराचे नाव आहे. किशोर दंडवते (रा. साकुरी, ता. राहाता) यांनी राहाता पोलिस ठाण्यात फिर्याद दिली होती.

मराठा आरक्षणाच्या जनजागृतीसाठी मनोज जरांगे यांची ८ ऑक्टोबरला राहता तालुक्यातील साकुरी येथे सभा झाली होती. या सभेत किशोर दंडवतेदेखील होते. सभेत किशोर यांच्या गळ्यातील सोनसाखळी चोरीला गेला होती. राहता पोलिसांकडे त्यांनी तक्रार दिली होती. यानंतर स्थानिक गुन्हे शाखा पोलिसांनी समांतर तपास सुरू केला. सभेचे चित्रीकरण झाले होते. तसेच आजूबाजूला सीसीटीव्हीतील चित्रीकरण संकलित करण्यात आले. या चित्रीकरणाचे विश्लेषण केल्यानंतर तांत्रिक पाळत ठेवण्यात आली. यात सराईत गुन्हेगार अमोल गीते याचा वावर आढळला.

स्थानिक गुन्हे शाखेच्या पोलिस पथकाने अमोल गीते याला ताब्यात घेतले. त्याच्याकडे चौकशी केल्यानंतर त्याने नवीन माने (पूर्ण नाव माहीत नाही, रा. भिंगार, ता. नगर) आणि संदीप झिंजवडे (पूर्ण नाव माहीत नाही, रा. पाथर्डी) या दोघांना सोबत घेऊन मनोज जरांगे यांच्या सभेत घुसून चोरी केल्याची कबुली दिली.

पोलिसांनी अमोल गीते याच्याकडून तुटलेली सोनसाखळी जप्त केली आहे. अमोल याला राहता पोलिसांच्या ताब्यात देण्यात आले आहे. अमोल गीते हा सराईत गुन्हेगार आहे. त्याच्याविरोधात नगर, पुणे, सोलापूर जिल्ह्यांत जबरी चोरीसह घातपाताचे सात गुन्हे दाखल आहेत.