Maratha Reservation: मराठा आंदोलनाचे राजकीय पडसाद; ग्रामपंचायत सदस्यांचे राजीनामा सत्र सुरूच

Satara : मराठा आंदोलनाचे आता राजकीय पडसाद उमटू लागले आहेत. ग्रामपंचायत सदस्यपदाचा राजीनामा देण्याचे सत्र सुरू झाले आहे. पुणे जिल्ह्यात तीन जणांनी राजीनामे दिल्यानंतर हे राजीनामा देण्याचे सत्र आता सातारा जिल्ह्यात सुरू झाले आहे.

खटाव तालुक्यातील कान्हरवाडीच्या ग्रामपंचायत सदस्य कोमल जाधव यांनी थेट ग्रामपंचायत सदस्यपदाचा राजीनामा देऊन आरक्षणप्रश्नी सरकारचं लक्ष वेधून घेण्याचा प्रयत्न केला आहे. यामुळे आता महिलासुद्धा आक्रमक होताना दिसत आहेत.

दौंड तालुक्यातील कानगाव ग्रामपंचायतीतील तीन जणांनी राजीनामा दिला आहे. ग्रामपंचायत सदस्यत्वाचा या तिघांनी राजीनामा दिला आहे. कानगावच्या सरपंचांकडे हा राजीनामा सुपूर्त केला आहे. मनोज जरांगे पाटील यांच्या आंदोलनाला पाठिंबा देण्यासाठी या तिघांनी राजीनामा दिला आहे. केंद्र सरकार आणि राज्य सरकार आरक्षण देण्यासाठी टाळाटाळ करत असल्याने आपण हा राजीनामा देत असल्याचं या ग्रामपंचायत सदस्यांनी सांगितलं आहे.

मनोज जारंगे पाटील यांना पाठिंबा देण्यासाठी आणि मराठा आरक्षण मिळवण्यासाठी राज्यभर मराठा बांधवांनी ठिकठिकाणी साखळी उपोषण सुरू केले आहे. या आंदोलनात आता महिलाही मोठ्या प्रमाणावर आक्रमक झाल्याचे चित्र आहे. मराठा आरक्षण मिळेपर्यंत नेत्यांना गावबंदी करण्याचा निर्णय विविध गावांनी घेतला आहे.

नगर जिल्ह्यातील 36 गावांमध्ये राजकीय नेत्यांना बंदी घालण्यात आली आहे. वकील गुणरत्न सदावर्ते यांचा पुतळादेखील जाळण्यात आला आहे. "जोपर्यंत मराठा समाजाला आरक्षण मिळत नाही तोपर्यंत कोणत्याही राजकीय पक्षाच्या नेत्याला गावात प्रवेश करू देणार नाही," अशी शपथ पंढरपूरजवळच्या गादेगाव येथील मराठा समाजाने घेतली आहे. जरांगे पाटील यांच्या आंदोलनाला पाठिंबा म्हणून येथील मराठा बांधवांनी बेमुदत उपोषण सुरू केले आहे. या वेळी ग्रामपंचायत निवडणुकीत मतदान न करण्याचा निर्णयही घेतला आहे.