Shivendrasingh raje bhosale : लेकीचा शाही विवाह सोहळा; तरीही शिवेंद्रराजे भोसले विसरले नाहीत कर्तव्य! CM फंडात मोठा निधी देत घातला आदर्श पायंडा

साताऱ्यातील शेंद्रे परिसरात पार पडलेल्या भव्य विवाह सोहळ्यात समाजासाठी आदर्श ठरणारी घटना घडली आहे. सार्वजनिक बांधकाममंत्री आणि लातूरचे पालकमंत्री शिवेंद्रसिंहराजे भोसले यांच्या कन्या राजकुमारी ऋणालीराजे भोसले आणि रविराज देशमुख यांच्या विवाहावेळी समाजाप्रती असलेली जबाबदारी दाखवणारा एक उल्लेखनीय निर्णय शिवेंद्रसिंहराजे यांनी घेतला.

समारंभात राज्याचे मुख्यमंत्री देवेंद्र फडणवीस यांच्यासह विविध विभागांचे माजी आणि विद्यमान मंत्री, आमदार तसेच अनेक मान्यवर उपस्थित होते. शुभेच्छा आणि आनंदाच्या वातावरणात शिवेंद्रसिंहराजे यांनी नववधू आणि वराच्या हस्ते मुख्यमंत्री फडणवीस यांना दहा लाख रुपयांचा धनादेश सुपूर्द केला. हा निधी लातूर जिल्ह्यातील ओल्या दुष्काळग्रस्त नागरिकांच्या सहाय्यासाठी मुख्यमंत्री सहाय्यता निधीत जमा करण्यात येणार आहे.

सामाजिक संकटाच्या काळात मदतीचा हात पुढे करणारी ही कृती उपस्थित सर्वांनी कौतुकाने पाहिली जातेय. वैयक्तिक आनंदाच्या क्षणीसुद्धा समाजातील अडचणीतील लोकांची जाणीव ठेवत केलेली मदत नेतृत्वगुणांची जाणीव करून देणारी असल्याची प्रतिक्रिया पाहुण्यांनी दिली. लातूर जिल्ह्यातील अनेक भागांमध्ये ओल्या दुष्काळामुळे लोकांचे मोठ्या प्रमाणात नुकसान झाले आहे. अशा वेळी मिळालेला हा निधी तेथील शेतकरी व नागरिकांसाठी दिलासा ठरेल, अशी अपेक्षा व्यक्त केली जात आहे.

या कार्यक्रमात राजकीय, सामाजिक आणि औद्योगिक क्षेत्रांतील अनेक मान्यवर उपस्थित होते. त्यांच्या समोरच भोसले यांनी दाखवलेली सामाजिक बांधिलकी प्रेरणादायी ठरली. फक्त राजकीय पदापुरती मर्यादा न ठेवता समाजहिताला प्राधान्य देण्याचा संदेश या उपक्रमातून स्पष्टपणे दिसून आला.

विवाहसोहळ्यासारख्या कौटुंबिक आणि आनंददायी प्रसंगाचा उपयोग करून समाजाच्या संकटग्रस्त घटकांना मदत करण्याचा प्रयत्न ही एक सकारात्मक दिशा दाखवणारी बाब ठरली आहे.