खासदार निंबाळकर, खोत आणि गोरे भेटले पंतप्रधान मोदींना!

नवी दिल्ली : संसदेच्या अधिवेशनादरम्यान (Parliament Session) देशभरातील अनेक खासदार, नेते पंतप्रधान नरेंद्र मोदींच्या (PM Narendra Modi) भेटीसाठी उत्सुक असतात. त्यांच्याकडे राज्यातील विविध प्रश्न, समस्या पोहचविण्यासाठी जणू रांग लागलेली असते. त्यात महाराष्ट्रातील खासदार, नेतेही मागे नसतात. अर्थसंकल्पीय अधिवेशनादरम्यान (Budget Session) माढा मतदारसंघाचे खासदार रणजितसिंह नाईक निंबाळकर (Ranjeetsingh Naik Nimbalkar), माजी राज्यमंत्री आमदार सदाभाऊ खोत (Sadabhau Khot) आणि माण खटावचे आमदार जयकुमार गोरे (Jaykumar Gore) यांनीही पंतप्रधान मोदींनी संसद भवनात भेट घेतली.

केंद्रीय अर्थमंत्री निर्मला सीतारमण यांनी मंगळवारी संसदेत अर्थसंकल्प सादर केला. यापार्श्वभूमीवर महाराष्ट्रातील या तीन नेत्यांनी बुधवारी मोदींची भेट घेत अर्थसंकल्पातील विविध योजना व तरतुंदीबाबत त्यांचे आभार मानले. शेतकऱ्यांचा शेतमाल खरेदी करणे, बजेट फार्मिंग योजना कार्यान्वित करणे, पिकांवर लक्ष ठेवण्यासाठी ड्रोनची व्यवस्था करणे, शेतमाल अधिक वेगाने बाजारपेठेत पोचवण्यासाठी रेल्वेचे जाळे, शेतीमध्ये आधुनिकीकरण करण्यासाठी कृषी महाविद्यालय स्थापण करणे, स्टार्टअप योजनेअंतर्गत नाबार्डच्या माध्यमातून कर्जपुरवठा करणे, असे निर्णय घेतल्याबद्दल खोत यांनी आभार मानले. (Union Budget 2022)

साखर कारखान्यांवर सेंट्रल बोर्ड ऑफ डायरेक्ट टॅक्सेशनने आकारलेला प्राप्तिकर रद्द करण्याबाबतचा महत्वपूर्ण निर्णयही घेण्यात आला आहे. या निर्णयाने ऊस उत्पादक शेतकऱ्यांना तसेच साखर कारखान्यांना मोठा दिलासा मिळाला आहे. त्याबद्दलही खोत यांच्यासह रणजितसिंह नाईक निंबाळकर व जयकुमार गोरे यांनी आभार मानले. केंद्रतील सरकार निश्चितपणे शेतकऱ्यांना प्रगतीपथावर घेऊन जाण्यासाठी प्रयत्नशिल राहिल, असं आश्वासन मोदींनी यावेळी दिल्याचे नेत्यांनी सांगितले. तीन कृषी कायदे मागे घेतले असले तरी देशातील शेतकऱ्यांना शेतमाल खरेदी विक्रीसाठी सर्व स्तरावर मदत केली जाईल, असा विश्वास भेटीदरम्यान मोदींनी व्यक्त केला.

यावेळी जिहे- कठापूर योजनेच्या अनुषंगाने चर्चा करण्यात आली. यावेळी पंतप्रधान मोदी यांनी लवकरात लवकर निधी उपलब्ध करून देण्याचे आश्वासन दिले आणि या योजनेच्या उद्घाटनप्रसंगी उपस्थित राहणार असल्याचे मत व्यक्त केले. या योजनेला आर्थिक बजेटमध्ये तरतूद करून देण्यात येईल, असं आश्वासन दिल्याचे गोरे यांनी सांगितले.