सोमय्यांच्या टीकेवर गृहराज्यमंत्री म्हणाले, कितीही त्रास दिला तरी शिवसेना डगमगणार नाही...

सातारा : शिवसेना नेते खासदार संजय राऊत यांची अलिबाग आणि दादर येथील मालमत्ता ईडीने जप्त केली आहे. या कारवाईच्या विरोधात बोलताना राज्याचे गृहराज्यमंत्री शंभूराज देसाई म्हणाले, केंद्रातील लोकांविरुद्ध जे बोलतायत आणि मुद्दाम जुनी प्रकरणे बाहेर काढण्याचे काम सध्या सुरू आहे. पण, कोणी कितीही त्रास दिला, अडचणी आणल्या तरी शिवसेना डगमगणार नाही.

शिवसेना नेते खासदार संजय राऊत यांच्यावर ईडीने केलेल्या कारवाईनंतर भाजप नेते किरीट सोमय्या यांनी पत्रकार परिषद घेऊन राउत यांच्यावर टीका केली आहे. या बाबत गृहराज्यमंत्री शंभूराज देसाई यांना विचारले असता त्यांनी किरीट सोमय्या यांच्यावर जोरदार टीका केली आहे.

शंभूराज देसाई म्हणाले, ''किरीट सोमय्या यांच्याकडे किती लक्ष द्यायचं हे आता ठरवायची वेळ आली आहे. ते नेहमीच आरोप करत असतात. कोणत्या तरी जुन्या गोष्टी काढायच्या आणि त्यावर आरोप करायचे ही त्यांची सवय होऊन बसली आहे. त्यामुळे शिवसेना अशा तथ्य हिन आरोपांकडे फारसे लक्ष देत नाही. केंद्रातील लोकांविरोधात जे बोलतात त्यांची मुद्दामहून जुनी प्रकरणे बाहेर काढण्याचे काम सध्या सुरू आहे. पण, कोणी कितीही त्रास दिला, अडचणी आणल्या तरी शिवसेना डगमगणार नाही, असे त्यांनी स्पष्ट केले.