BJP Politics : सांगलीत भाजपची ताकद आणखी वाढली? दक्षिण भारत जैन सभेचे चेअरमन हाती घेणार'कमळ'

Sangli News : काँग्रेसच्या बंडखोर नेत्या तथा जिल्हा बँकेच्या उपाध्यक्षा जयश्री पाटील यांच्या प्रवेशानंतर सांगलीतील आणखी एक मोठे नेते भाजपमध्ये प्रवेश करणार आहेत. दक्षिण भारत जैन सभेचे चेअरमन आणि महाराष्ट्र राज्य जैन अल्पसंख्याक आर्थिक विकास महामंडळाचे सदस्य रावसाहेब पाटील भाजपच्या वाटेवर आहेत. आज मंगळवारी (24 जून) सांगली, कोल्हापूर जिल्ह्यांतील कार्यकर्त्यांसह त्यांचा भाजप प्रवेश संपन्न होणार आहे.

रावसाहेब पाटील यांचे दक्षिण भारत जैन सभेच्या माध्यमातून मोठे काम असून त्यांनी सांगली, कोल्हापूर, सातारा जिल्ह्यांत सामाजिक, राजकीय, शैक्षणिक क्षेत्रात योगदान दिलं आहे. तसेच त्यांनी जैन सभेच्या माध्यमातून जैन समाजामधील विविध सामाजिक, सांस्कृतिक प्रश्नांना हात घातला आहे.

काहीच दिवसांपूर्वी सांगलीत वैभव पाटील, जयश्री पाटील यांच्यानंतर आता दक्षिण भारत जैन सभेचे अध्यक्ष आणि महाराष्ट्र राज्य जैन अल्पसंख्याक आर्थिक विकास महामंडळाचे सदस्य रावसाहेब पाटील ही हाती कमळ घेणार आहेत. त्यांच्या भाजप प्रवेशामुळे भाजप पक्षाची जैन समाजाची घडी अधिक बळकट होईल, असा विश्वास व्यक्त करण्यात येत आहे.