Satara NCP : शरद पवारांचे साताऱ्यात जंगी स्वागत; युवकांकडून पुष्पवृष्टी आणि घोषणाबाजी

Sharad Pawar News : देश का नेता कैसा हो, शरद पवार जैसा हो, शरद पवार तुम आगे बढो हम तुम्हारे साथ है, राष्ट्रवादी काँग्रेस NCP पक्षाचा विजय असो, अशी घोषणाबाजी आणि पुष्पवृष्टी करत राष्ट्रवादी युवक, युवती सेल व जिल्हा कार्यकारिणीने शरद पवार Sharad Pawar यांचे जंगी स्वागत केले. यावेळी विश्रामगृहापर्यंत रस्त्याच्या दुतर्फा उभे राहून राष्ट्रवादीच्या युवकांनी श्री. पवार यांच्या गाड्यांच्या ताफ्यावर पुष्पवृष्टी केली.

राष्ट्रवादीचे अध्यक्ष खासदार शरद पवार यांनी राजीनामा देण्याचा निर्णय मागे घेतल्यानंतर आज सायंकाळी त्यांचे निपाणीहून दोन दिवसांच्या दौऱ्यासाठी साताऱ्यात प्रथमच आगमन झाले. यावेळी राष्ट्रवादी युवक, विद्यार्थी, युवती सेल, महिला आघाडी, जिल्हा कार्यकारिणीचे पदाधिकारी व कार्यकर्ते सैनिक स्कुलच्या मैदानाच्या गेटपासून ते विश्रामगृहापर्यंत रस्त्याच्या दुतर्फा उभे होते.

त्यांनी शरद पवार यांच्या गाड्यांच्या ताफ्यावर पुष्पवृष्टी करत स्वागत केले. यावेळी कार्यकर्त्यांनी देश का नेता कैसा हो, शरद पवार जैसा हो.., पवार साहब तुम आगे बढो हम तुम्हारे साथ है..., राष्ट्रवादी काँग्रेस पक्षाचा विजय असो.., महाराष्ट्राचा बुलंद आवाज शरद पवार... शरद पवार.., अशी घोषणाबाजी केली. शासकिय विश्रामगृहात श्री. पवार यांच्या गाड्यांचा ताफा आल्यानंतर एकच गर्दी झाली होती.

यावेळी युवती सेल व महिला आघाडीच्यावतीने श्री. पवार यांचे औक्षण करण्यात आले. त्यानंतर श्री. पवार हे शासकिय विश्रामगृहातील दालनात दाखल झाले. यावेळी श्री. पवार यांना भेटण्यासाठी लोकप्रतिनिधी, कार्यकर्ते, पदाधिकारी व महिलांची मोठी गर्दी झाली होती. सर्वजण आपल्या नेत्याला पाहून आनंदाने भारावून गेले होते.