Satyajit Deshmukh : शिराळ्यातील मतदारांना विकासाची आस - सत्यजित देशमुख

शिराळा : ‘‘शिराळा विधानसभा मतदार संघातील नागरिकांना दिवंगत शिवाजीराव देशमुख यांना अभिप्रेत असणारा विकास हवा असल्याने त्यांनीच ही निवडणूक हाती घेतली आहे. त्यामुळे आपल्या समोर कितीही बलाढ्य विरोधक असला, तरी त्याला २० नोव्हेंबरच्या मतदानाने आता जनताच चारीमुंड्या चीत केल्याशिवाय राहणर नाही,’’ असे प्रतिपादन भाजप मित्रपक्ष महायुतीचे उमेदवार सत्यजित देशमुख यांनी केले.

वाटेगाव (ता. वाळवा) येथे प्रचार दौऱ्यादरम्यान ते बोलत होते. यावेळी भाजप शिराळा विधानसभा निवडणूक प्रमुख सम्राट महाडिक, जिल्हा उपाध्यक्ष जयराज पाटील, अशोकराव पाटील, राहुल पाटील यांची प्रमुख उपस्थिती होती. सत्यजित देशमुख म्हणाले, ‘‘शिराळा मतदार संघाच्या विकासासाठी शिवाजीराव देशमुख यांनी केलेले प्रामाणिक प्रयत्न आणि २७ वर्षांपासून दिलेले योगदान नागरिकांनी लक्षात ठेवले आहे.

या मतदारसंघाच्या विकासाची दृष्टी नसलेल्या विद्यमान आमदारांनी निव्वळ बैठकाचा फार्स करून नागरिकांच्या डोळ्यांमध्ये धूळफेक करण्याचे काम केले आहे, हे त्यांच्या आता लक्षात आले आहे. कोणतेही काम करताना आपल्याकडे विकासाचे व्हिजन असावे लागते. नेमके तेच व्हिजन विरोधकांकडे नसल्याने, विकासाचा कोणताही ठोस मुद्दा नसल्याने टीका करून दिशाभूल केली जात आहे.’’

सम्राट महाडिक म्हणाले, ‘‘मतदार संघाच्या विकासाचा वेग वाढवायचा असेल, तर आपल्या हक्काचा व विचारांचा आमदार हवा. आपणाला मतदार संघाचा विकास करावयाचा असेल तर विधानसभेत बोलणारा नेता हवा. न बोलणारा विद्यमान आमदार आपल्या कामाचा नसल्याने ही निवडणूक मतदारांनी हाती घेतल्याने परिवर्तन अटळ आहे. सत्यजित देशमुख यांच्या विजयात आमचा सिंहाचा वाटा असेल. २३ नोव्हेंबरला गुलाल आपलाच असणार आहे.’’

यावेळी उपसरपंच सोनाली पाटील, हेमंत मुळीक, शेणे सरपंच विनायक निकम, किरण उपळे, जयकर कदम, राहुल पाटील, दिग्विजय पाटील, सुधाकर यादव, जयवंत नांगरे, रमेश साळुंखे, सतीश पाटील, सागर पाटील, राजेश पाटील, समीर जाधव, संजय नलवडे, काका ठोंबरे, नाना अवताडे, संकल्प जाधव, अभिजित मुळीक, प्रवीण फोंडे, नीलेश मोटे, वासीम जमादार, दिनकर देसाई उपस्थित होते.