Satara News : शिवेंद्रसिंहराजेंच्या पाठपुराव्याला यश; विकासकामांना १२ कोटी ६४ लाखांचा निधी मंजूर

Satara News: सातारा शहरातील विविध विकासकामांसाठी १२ कोटी ६४ लाख ५२ हजार रुपये निधी मंजूर करण्यात आला आहे. आमदार शिवेंद्रसिंहराजेंच्या मागणीनुसार जिल्हाधिकारी रुचेश जयवंशी यांनी जिल्हा नियोजन समितीच्य २०२२-२३ या आर्थिक वर्षाकरिता महाराष्ट्र नगरोत्थान महा अभियान अनुदान योजनेतून या निधीला मंजुरी दिली आहे.

आमदार शिवेंद्रसिंहराजे भोसले (Shivendraraje bhosale) यांनी सातारा शहरातील विविधप्रकारची विकासकामे मार्गी लावण्यासाठी निधी मागणीचे पत्र जिल्हाधिकारी यांना दिले होते. या मागणीनुसार जिल्हा नियोजन समितीच्या नगरोत्थान महाअभियान अनुदान योजनेतून निधी मंजूर करण्यात आला आहे.

सातारा शहरातील अजंठा चौक येथील उड्डाण पुलाच्या खालील जागा विकसित करणे यासाठी १ कोटी ८७ लाख २४ हजार रुपये, अजिंक्यतारा किल्ला रस्ता विकसित करण्यासाठी (भाग १) १ कोटी ७१ लाख ९० हजार आणि किल्ल्याच्या दुसऱ्या भागातील रस्ता विकसित करण्यासाठी १ कोटी ७१ लाख ९० हजाररुपये निधी मंजूर करण्यात आला आहे.

शहरातील बॉम्बे रेस्टोरंट चौक ते मंगलमूर्ती रेसिडेन्सी अपार्टमेंट अखेर गटर करणे यासाठी १ कोटी ५९ लाख ८१ हजार, प्रभाग क्र. १४, केसरकर पेठ सि.स.नं. ४६ अ नाला जवळ रिटेनिंग वॉल बांधणे १७ लाख १६ हजार, बगाडे हॉस्पिटल, कुंभारवाडा, शाहू उद्यान अखेर व गुरुवार पेठ कूपर कारखाना ते टोपे मामा दत्त मंदिर अखेर रस्ता डांबरीकरण करणे १ कोटी ९९ लाख ५६ हजार अशी विविध रस्त्यांची मार्गी लावली जाणार आहे.

तसेच सातारा शहरातील भुयारी गटर योजनेमुळे खराब झालेले पश्चिम भागातील रस्ते दुरुस्त करणे यासाठी ७६ लाख ४० हजार आणि सातारा शहरातील मुख्य रस्त्यांना थर्मोप्लास्ट पेंट मारणे व रहदारीच्या विविध उपाययोजना करणे यासाठी ५१ लाख ९८ हजार रुपये निधी मंजूर झाला आहे.