अगवणेंच्या खांद्यावर बंदूक ठेऊन सभापतींचे राजकारण...अनुप शहा

सातारा : विधान परिषदेचे सभापती रामराजे नाईक निंबाळकर हे स्वतः दिगंबर अगवणेंच्या खांद्यावर बंदूक ठेवून गलिच्छ राजकारण करत आहेत. तसेच त्यांच्याकडून खासदारांना बदनाम करण्यासाठी शिखंडीचे युद्ध सुरू असल्याची टीका भाजपचे अल्पसंख्यांक मोर्चा प्रदेश उपाध्यक्ष अनुप शहा यांनी केली आहे.

गेल्या काही महिन्यांपासून फलटणमध्ये खासदार रणजितसिंह नाईक निंबाळकर आणि दिगंबर आगवणे यांच्यात संघर्ष सुरू आहे. यामध्ये दिगंबर आगवणे यांनी खासदारांवर दाखल केलेल्या तक्रारी खोट्या असल्याचे समोर आले आहे. ज्या तक्रारदाराने खासदार रणजितसिंह नाईक निंबाळकर यांच्यावर तक्रार दाखल केली त्यांनी स्वतःच पत्रकारांसमोर येत ही तक्रार दिगंबर आगवणे यांनी करण्यास भाग पडल्याचे कबूल केल्याने एकच खळबळ उडाली आहे.

याबाबत बोलताना भाजपचे अल्पसंख्यांक मोर्चाचे प्रदेश उपाध्यक्ष अनुप शहा यांनी या सगळ्या गोष्टींच्या मागे विधान परिषद सभापती रामराजे नाईक निंबाळकर असल्याचे खळबळजनक आरोप केला आहे. मालोजी राजेंच्या फलटणमध्ये सभापती स्वतः दिगंबर अगवणेंच्या खांद्यावर बंदूक ठेवून असेल गलिच्छ राजकारण करत आहेत. तसेच त्यांच्याकडून खासदारांना बदनाम करण्यासाठी शिखंडीचे युद्ध सुरू असल्याचे अनुप शहा यांनी सांगितले.