Indrajit Sawant : "कितीही मराठे एकत्र करा, ब्राह्मणांची ताकद..."; CM फडणवीसांच्या नावाचा उल्लेख करत इंद्रजीत सावंतांना जीवे मारण्याची धमकी

Kolhapur News, 05 Feb : कोल्हापुरातील इतिहास अभ्यासक इंद्रजीत सावंत (Indrajit Sawant) यांना एका अज्ञात व्यक्तीकडून जीवे मारण्याची धमकी देण्यात आली आहे. याबाबतची माहिती खुद्द इंद्रजीत सावंत यांनी दिली आहे.

याबाबत सावंत यांनी फेसबुकवर एक पोस्ट शेअर केली आहे. यामध्ये त्यांनी संबंधित व्यक्तीचे आणि त्यांचे कॉल रेकॉर्डिंग शेअर केले आहे. यामध्ये सावंत हे ब्राह्मण (Brahmin) समाजाबाबत द्वेष पसरत असल्याचा आरोप करत त्यांना घरात घुसून मारण्याची धमकी देण्यात आली आहे.

संबंधित कॉल रेकॉर्डिंग हे सध्या सोशल मीडियावर मोठ्या प्रमाणात व्हायरल होत आहे. यामध्ये धमकी देणारा व्यक्ती सावंत यांना शिवीगाळ देखील करत आहे. इतकेच नव्हे तर छत्रपती शिवाजी महाराज (Shivaji Maharaj) यांच्याबाबत देखील अवमानकारक वक्तव्य या व्यक्तीने केल्याचा दावा सावंत यांनी केला आहे.

प्रशांत कोरटकर असं या व्यक्तीचं नाव असल्याचं सावंत यांनी आपल्या पोस्टमध्ये लिहिलं आहे. इतिहास अभ्यासक इंद्रजीत सावंत हे सातत्याने समाज माध्यमात आपली भूमिका मांडत असतात. नुकतंच छावा चित्रपट (Chhaava) आल्यानंतर त्यांनी आपली भूमिका मांडली होती.

ही भूमिका मांडत असताना त्यांनी ब्राह्मण समाजाचा द्वेष केल्याचा आरोप करत प्रशांत कोरटकर नावाच्या व्यक्तीने त्यांना फोन करून थेट धमकी दिली आहे. "जिथं असाल तिथे येऊन ब्राह्मणांची ताकद दाखवू, तुम्ही कितीही मराठे एकत्र करा", असं म्हणत या व्यक्तीने सावंतांना अर्वाच्य भाषेत शिवीगाळ केली आहे. तसंच घरात येऊन मारण्याची दिली धमकी देण्यात आली आहे.

दरम्यान या कॉल रेकॉर्डिंगमध्ये, संबंधित व्यक्तीने मुख्यमंत्री देवेंद्र फडणवीस (Devendra Fadnavis) यांच्या जातीचा उल्लेख देखील केला आहे.सध्या हे कॉल रेकॉर्डिंग सोशल मीडियावर व्हायरल झाले असून त्यावर नेटकऱ्यांच्या संतप्त प्रतिक्रिया उमटत आहेत.

Edited By Jagdish Patil