Radhakrishna Vikhe Patil : बाळासाहेब थोरात खिंड सोडुन पळुन गेले : राधाकृष्ण विखे पाटील

Karad News : मी भारतीय जनता पक्षात गेल्यानंतर बाजीप्रभु देशपांडे यांच्यासारखा मी एकटा खिंड लढवणार आहे, अशी भिमगर्जना बाळासाहेब थोरात (Balasaheb Thorat) यांनी केली होती. त्यांनी आता खिंड सोडुन पळ काढला आहे, अशी उपरोधिक टीका महसूल मंत्री राधाकृष्ण विखे-पाटील (Radhakrishna Vikhe Patil) यांनी थोरातांवर केली आहे.

नाशिक पदवीधर निवडणूक निकालानंतर राज्यात विविध राजकीय चर्चा रंगू लागल्या आहेत. राज्यातील या घडामोडींबद्दल महसूल मंत्री राधाकृष्ण विखे-पाटील यांनी आज कराडात माध्यमाशी संवाद साधला. यावेळी कृष्णा बॅंकेचे अध्यक्ष अतुल भोसले यावेळी उपस्थित होते.

मंत्री विखे-पाटील म्हणाले, तुम्ही देशातील अध्यक्षांकडे जाऊन भांडा किंवा महाराष्ट्राचे जे प्रभारी असतील त्यांच्याकडे जाऊन भांडा. परंतु पक्षाचा अंतर्गत वादाचा परिणाम महाविकास आघाडीवर झालेला आहे. त्याची जबाबदारी ते घेणार की नाही, हा प्रश्न महत्वाचा आहे.

नाशिक पदवीधर मतदारसंघात महविकास आघाडीचा अधिकृत उमेदवार होता आणि काँग्रेस पक्ष हा महाविकास आघाडीचा घटक पक्ष आहे. पण, काँग्रेसने महविकास आघाडीचा उमेदवार निवडून आणण्यासाठी का प्रयत्न केला नाही, असाही सवाल त्यांनी उपस्थित केला.