बार्शी स्कॅमबद्दल विशाल फटेकडून माहितीचा डोंगर : पोलिसच म्हटले आता पुढची चौकशी नंतर

सोलापूर : बार्शीचा हर्षद मेहता (Harshad Mehta)अशी ओळख असलेल्या विशाल फटे (Vishal Phate) याला न्यायालयाने १४ दिवसांची न्यायालयीन कोठडी सुनावली आहे. विशाल फटे याला या आधी न्यायालयाने २७ जानेवारीपर्यंत पोलिस कोठडी दिली होती. 8 दिवसांच्या पोलिस कोठडीत मिळालेल्या माहितीचे विश्लेषण करणे आवश्यक असल्याने पोलिस कोठडीचा हक्क अबाधित ठेवत पोलीसांनी न्यायालयीन कोठडीची मागणी केली.

पोलिस कोठडीत असल्यानंतरच आरोपीची चौकशी करता येते. त्याला न्यायालयीन कोठडीत म्हणजे कारागृहात पाठविण्याची विनंती पोलिसांनीच केली. त्यामुळे त्याने दिलेल्या माहितीच्या आधारे आता विश्लेषण करून पुढील रणनीता आता पोलिस आखत आहेत. आतापर्यंत त्याने कसे पैसे गोळा केले, ते कुठे गुंतवले, त्यात कोण सहभागी होते याची माहिती पोलिस घेत होते. फटेने फसवणूक केलेल्यांना न्याय देण्यासाठी त्याच्या मालमत्तांची माहिती मिळणे आवश्यक आहे. त्या जप्त करण्याची प्रक्रिया पोलिसांना करावी लागेल. आतापर्यंत मालमत्ता म्हणून पोलिसांच्या हाती फार लागलेले नाही. या मालमत्ता विकूनच पोलिस व महसूल विभाग गुंतवणूकदारांना काही रक्कम देऊ शकतो. आतापर्यंत 99 तक्रारदारांनी फटेविरुद्ध तक्रारी दिल्या आहेत. त्या तक्रारींची शहानिशा पोलिसांना करायची आहे. त्यामुळेच आता आलेल्या माहितीचे विश्लेषण करण्याची भूमिका पोलिसांनी घेतली आहे.

दरम्यान, विशाल फटे याने बार्शीतीलच (Barshi Scam) नव्हे तर राज्यभरातील हजारो लोकांना गंडा घातल्याची चर्चा आहे. फटेविरोधात तक्रारींचा ओघ सुरूच आहे. त्यामुळे या प्रकरणाची व्याप्ती दिवसेंदिवस वाढत आहे. या प्रकरणी फिर्यादी दीपक आंबुरे यांच्या फिर्यादीवरुन मुख्य सूत्रधार विशाल फटे याच्यासह पत्नी राधिका फटे, वडील अंबादास फटे, भाऊ वैभव फटे व अलका फटे (सर्वजण रा. कर्मवीर हौसिंग सोसायटी, अलिपूर रोड, बार्शी) यांच्याविरुध्द 14 जानेवारीला गुन्हा दाखल झाला होता. पोलिसांनी वडील व भावाला अटक केल्यानंतर विशाल फटे पोलिसांना शरण आला होता. त्यानंतर न्यायालयाने त्याला पोलिस कोठडी सुनावली होती.

शेअर बाजाराच्या (Share Market) माध्यमातून जादा पैसे मिळवून देण्याचे आमिष दाखवून फटेने गुंतवणूकदारांना कोट्यवधींचा गंडा घातला आहे. फटे याने बार्शीत विशालका कन्सल्टन्सी सर्व्हिसेस प्रा. लि., जे. एम. फायनान्सियल सर्व्हिसेस आणि अलका शेअर सर्व्हिसेस या तीन कंपन्यां स्थापना केल्या होत्या. या कंपन्यांच्या माध्यमातून त्याने गुंतवणूकदारांना जादा पैशांचे अमिष दाखविले. सुरवातीला काही महिने त्याने गुंतवणुकदारांना परतावा दिला. नंतर त्याने गुतंवणूकदारांना परतावा न देता त्यांना गंडा घातला.

विशाल फटे याने बार्शीसह राज्यभरात अनेक गुंतवणूकदारांची फसवणूक केल्याचे समोर येत आहे. फटे विरोधातील तक्रारींचा ओघ सुरूच आहे. आतापर्यंत 99 जणांनी तक्रार दिलेली आहे. यामुळे फसवणुकीचा आकडाही वाढून 20 कोटी रुपयांवर पोचला आहे. फटेने फसवणूक केल्याप्रकरणी पुढे आलेले बहुतांश गुंतवणूकदार हे बार्शीतील आहेत. तसेच, उस्मानाबाद आणि पुण्यातील काही जणांचाही समावेश आहे. आर्थिक गुन्हे शाखा या तक्रारदारांच्या कागदपत्रांची तपासणी करुन फसवणुकीची आकडा निश्चित करीत आहे.