बायको अन् दीड वर्षाच्या मुलीसोबत आत्महत्या करणार होतो! विशाल फटेनंच दिली कबुली

बार्शी : मागील काही दिवसांपासून अनेकांना कोट्यवधी रुपयांचा गंडा घालणारा विशाल फटे (Vishal Phate) याची मोठ्या प्रमाणात चर्चा सुरू आहे. फटे हा फरार असल्याने त्याच्या शोधासाठी पोलिसांनी (Police) विशेष तपास पथक तैनात करण्यात आले आहे. आज अखेर फटे हा यूट्यूब लाईव्हच्या माध्यमातून सगळ्यांसमोर आला. त्याने आपल्यावरील आरोपांना उत्तर दिले असून, पोलिसांच्या कारवाईला सामोरे जाण्याची तयारी दर्शवली आहे.

फटे याने म्हटले आहे की, माझ्यावर झालेल्या चिखलफेकीमुळे मी बायको मुलीसह आत्महत्या करणार होतो. लोक मला असे करतील, तसे करतील, अशी भीती मला होती. या बदनामीमुळे जगण्यापेक्षा मरणे सोपे वाटत होते. बायको आणि दीड वर्षांच्या मुलीला घेऊन मी आत्महत्येचा विचार करीत होतो. माझ्या वडिलांचे नाव फक्त ऑन रेकॉर्ड कंपनीत आहे. त्यांना त्यातून एकही पैसा मिळाला नसून, त्यांचा याच्याशी काहीही संबंध नाही. आता फाशी झाली तरी मी त्याचा स्वीकार करेन.

सांगलीवाला दुबईत जाऊन बसला

आता सगळेच मला वाईट म्हणत आहेत. माझ्यापेक्षा किती मोठी धेंडे आहेत. सांगलीवाला त्याच्यावर एकही केस नाही. त्याने पैसे गोळा केले दुबईला गेला आणि तिथे जाऊन बिझनेस केला. आज संध्याकाळी मी पोलीस ठाण्यात हजर होणार आहे. मी कुणाचाही एक पैसा बुडवणार नाही. वेळ पडल्यास भीक मागून मी पैसे देईन, याची मी 101 टक्के गॅरंटी देतो. हे सगळे मी जाणूनबुजून केले नाही. लोकांनी माझ्यावर चिखलफेक केली. माझ्या परिवाराची बदनामी केली, असे फटेने सांगितले.

पोलिसांना माझी मालमत्ता गोठवावी

दहा ते बारा कोटी रुपयांचा आकडा असताना 200 कोटी रुपयांचा आकडा त्यांनी आणला. कुणीही माझ्यासाठी जमीन गहाण ठेवलेली नाही. माझ्यामुळे घरे नसलेल्या 40 जणांची घरे झाली. सायकल नसलेले लोक आता माझ्यामुळे चारचाकी घेऊन फिरत आहेत. मी स्वत;हून पोलिसांसमोर शरण येत आहे. पोलिसांनी माझी मालमत्ता गोठवावी. त्यांना योग्य वाटेल ती कारवाई त्यांनी करावी, असेही तो म्हणाला.

सुमारे 18 ते 19 कोटींच्या फसवणुकीचा अंदाज

फटेच्या फसवणुकीचा प्रताप केवळ बार्शी तालुक्यापुरता मर्यादित राहिला नसून, इतर तालुक्यांसह राज्यभरातील लोकांच्या तक्रारी आता येऊ लागल्या आहेत. आतापर्यंत 76 जणांनी तक्रार दिली असून, फसवुणकीचा आकडा 18 ते 19 कोटींच्या घरात गेला आहे. मात्र, त्याने राज्यभरात अनेकांना गंडविल्याने सुमारे 500 कोटी रुपयांपर्यंतची फसवणूक झाल्याची चर्चा आहे. विशाले फटे यांनी जादा परताव्याच्या अमिषाने राज्यातील इतर जिल्ह्यांत कमिशन एजंट नेमून पैसे गोळा केले असल्याचे समोर येत आहे. यावर आता फटेनेच समोर येत उत्तर दिले आहे.