याकुब मेमन कबर सुशोभीकरणावरून उदयनराजे भडकले...राजेशाही असती तर...

सातारा : अतिरेकी याकुब मेमनच्या कबरीचे सुशोभीकरण केल्यामुळे सध्या राज्यात संतापाची लाट पाहायला मिळत आहे. यावर छत्रपती शिवाजी महाराजांचे तेरावे वंशज खासदार उदयनराजे भोसले ही भडकले. ते म्हणाले, राजेशाही असती तर हे होऊनच दिलं नसतं. महाविकास आघाडीला हे सुशोभीकरण दिसलं नव्हतं का असा प्रश्न त्यांनी उपस्थित केला.

अतिरेकी याकूब मेमन याच्या कबरीचं करण्यात आलेल्या सुशोभीकरणाबाबत खासदार उदयनराजे भोसले यांना विचारल्यावर त्यांनी त्यांच्या स्टाईलने उत्तर दिलं. ते म्हणाले, तुम्हा लोकांनाच लोकशाही पाहिजे होती. राजेशाही असती तर हे होऊनच दिलं गेलं नसतं. मुख्यमंत्री एकनाथ शिंदे गटाच्या शिवसेनेने आणि भाजपने त्या विरोधात पाऊल उचलले ही चांगली गोष्ट आहे.

आधीच्या महाविकास आघाडी सरकारला हे सुशोभीकरण दिसलं नव्हतं का, असा प्रश्न देखील खासदार उदयनराजे भोसले यांनी उपस्थित केला. यावेळी प्रतापगडावरील अफजल खान कबरीबाबत विचारलेल्या प्रश्नाला उत्तर देताना ती कबर प्रशासनाने लोकांना पाहाण्यासाठी खुली करावी, अशी मागणी त्यांनी केली आहे.