PM Modi Baramati Visit : PM मोदींचा नियोजित बारामती दौरा अचानक स्थगित : संसदेच्या अधिवेशनाची कुणकुण?

Baramati News, 22 Oct : पंतप्रधान नरेंद्र मोदी यांचा येत्या 3 नोव्हेंबर रोजी होणारा नियोजित बारामती दौरा स्थगित करण्यात आला असून पुढील तारीख ही लवकरच कळविण्यात येणार असल्याची माहिती विद्या प्रतिष्ठानच्या सूत्रांनी दिली आहे.

विद्या प्रतिष्ठान संकुलात उभारलेल्या प्रेरणास्थळ या इमारतीचे उदघाटन पंतप्रधान नरेंद्र मोदी यांच्या हस्ते होणार होते. पंतप्रधान कार्यालयाकडून 3 नोव्हेंबर ही तारीख निश्चित देखील करण्यात आली होती. त्या नुसार बारामतीत दौऱ्याची तयारीही सुरू झाली होती. मात्र, आता अचानक हा नियोजित दौरा स्थगित करण्यात आला आहे.

सुत्रांनी दिलेल्या माहितीनुसार काही कारणास्तव पंतप्रधानांचा नियोजित 3 नोव्हेंबरचा दौरा स्थगित करण्यात आल्याची माहिती पंतप्रधान कार्यालयाकडून विद्या प्रतिष्ठान संस्थेसह खासदार सुप्रिया सुळे यांना कळविण्यात आली आहे. तसंच 16 नोव्हेंबर रोजी पंतप्रधानांचा दौरा होऊ शकतो, मात्र या तारखेबाबत अद्याप हिरवा कंदील मिळालेला नसल्याचे सांगण्यात आले आहे.

मात्र, हा दौरा नेमका कशामुळे रद्द झाला याबाबत आता अनेक तर्कवितर्क लावले जात आहेत. अशातच मागील अधिवेशनात केंद्र सरकारने संसदेत आणलेले महिला आरक्षण आणि मतदारसंघ पुनर्रचना (Delimitation) यासंबंधीची संविधान दुरुस्ती विधेयकं मंजूर झाली नव्हती.

हीच विधेयकं नव्याने मंजुर करण्यासाठी सरकार संसदेचं अधिवेशन बोलावण्याच्या विचारात असल्याची चर्चा सुरू आहे. तर यामुळेच हा दौरा स्थगित करण्यात आला का? अशीही चर्चा सुरू आहे. मात्र, दौरा नेमका कोणत्या कारणासाठी स्थगित करण्यात आला? याबाबतची अधिकृत माहिती अद्याप समोर आलेली नाही.