मनसे नेता म्हणाला हात दुखतोय अन् राज ठाकरेंनी थेट मलमच लावून दिले...

मुंबई : मनसे प्रमुख राज ठाकरे (Raj Thackeray) यांचा दरारा उभ्या महाराष्ट्राला परिचीत आहे. त्यामुळे त्यांचे कार्यकर्ते, पक्षाचे नेते, पत्रकार हे देखील त्यांच्यासमोर जाताना विचार करुन जातात. पण आज महाराष्ट्राला आणि मनसे (Maharashtra Navnirman Sena) कार्यकर्त्यांना राज ठाकरे यांचे एक वेगळे पण अतिशय प्रेमळ रुप पहायला मिळाले. याबाबतचा एक व्हिडिओ देखील व्हायरल होत आहे. या व्हिडिओमध्ये राज ठाकरेंचे त्यांच्या पक्षातील कार्यकर्त्यांशी आणि नेत्यांशी किती भावनिक संबंध आहे हे दिसून येत आहे.

त्याच झालं असं की मनसेच्या कामगार सेनेचे अध्यक्ष मनोज चव्हाण (Manoj Chavan) आणि काही पदाधिकारी राज ठाकरेंच्या (Raj Thackeray) भेटीला त्यांच्या शिवतीर्थ या निवासस्थानी गेले होते. यावेळी सहज बोलताना मनोज चव्हाण यांनी राज ठाकरेंना "आज खांदा खूप दुखतोय साहेब असं म्हटलं." त्यावर राज ठाकरेंनी थांब जरा, म्हणत सहकाऱ्याकडून मलम मागवले आणि चव्हाण यांच्या खांद्यावर स्वत: हाताने ते लावले. राज ठाकरेंच्या या प्रेमामुळे चव्हाण काहीसे भावूक झाले होते.

मनसेचे नेते अविनाश जाधव (Avinash Jadhav) यांनी हा व्हिडीओ शेअर करत "मी राजसाहेबांना दैवत का म्हणतो याची प्रचिती पुन्हा एकदा आली" असं म्हटलं आहे. मनसेला सध्या मोठ्या प्रमाणावर गळती लागली आहे. नुकतीच महिला नेत्या रुपाली पाटील ठोंबरे यांनी मनसेला जय महाराष्ट्र केला आहे. त्यांच्यासोबत शेकडो कार्यकर्त्यांनी देखील राष्ट्रवादी काँग्रेस पक्षात प्रवेश केला आहे. अशा परिस्थितीमध्ये आज व्हायरल झालेला व्हिडिओ कार्यकर्ते आणि नेत्यांमध्ये भावनिक नात कायम असल्याचे सांगत आहे.