Shrikant Shinde : "CM शिंदेंनी माझ्याविरोधात लढावे", ठाकरेंच्या आव्हानावर श्रीकांत शिंदे म्हणाले, "आपली..."

काही दिवसांपूर्वी शिवसेना ( ठाकरे गट ) आमदार आदित्य ठाकरे ( Aaditya Thackeray ) ठाण्याच्या दौऱ्यावर होते. यावेळी "इलका हमारा, और धमका ही हमारा होगा" असं म्हणत आदित्य ठाकरे यांनी मुख्यमंत्री एकनाथ शिंदे यांना डिवचलं होतं. तसेच, "राजीनामा द्या आणि माझ्याविरोधात ठाण्यातून निवडणूक लढा," असं आव्हानही आदित्य ठाकरेंनी मुख्यमंत्र्यांना दिलं होतं. आता आदित्य ठाकरेंना खासदार श्रीकांत शिंदे यांनी प्रत्युत्तर दिलं आहे. ( Shrikant Shinde Reply Aaditya Thackeray Latest News )

शनिवारी ( 24 फेब्रुवारी ) ठाण्यातील युवा सेनेच्या युवा महोत्सवामध्ये खासदार श्रीकांत शिंदे यांची प्रकट मुलाखत गायक अवधुत गुप्ते यांनी घेतली. यावेळी श्रीकांत शिंदे यांनी आमदार आदित्य ठाकरे यांच्यावर सडकून टीका केली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

श्रीकांत शिंदे म्हणाले, "आव्हान कोण देतं आणि त्याला प्रतिसाद काय द्यायचा आपण ठरवायला हवं. हत्तीनं आपली चाल चालत राहावी. मागे कोण काय बोलतं, याकडे लक्ष देण्याची गरज नाही. आपली योग्यता काय? आपला संबंध काय? आपण बोलतो काय? मुख्यमंत्री शिंदे हे तोंडात सोन्याचा चमचा घेऊन जन्माला आले नव्हते. त्यांनी कष्टानं हे उभारलं आहे. त्यामुळे आव्हान देण्याची गरज नाही."

आदित्य ठाकरेंनी काय म्हटलं होतं?

"ठाणे हा शिंदेंचा बालेकिल्ला नाही, तर 'इलका हमारा, और धमका ही हमारा होगा'," असं आदित्य ठाकरे म्हणाले होते.

"एकनाथ शिंदे यांनी राजीनामा द्यावा आणि माझ्याविरोधात निवडणूक लढवावी, हा कोणाचा बालेकिल्ला नाही. एकनाथ शिंदे हे घटनाबाह्य अपयशी मुख्यमंत्री आहेत. 20 मे 2022 मध्ये एकनाथ शिंदे हे वर्षावर येऊन उद्धव ठाकरे यांच्यासमोर रडले आणि भाजप मला तुरूंगात टाकेल, असं सांगितलं," असं विधान आदित्य ठाकरेंनी केलं होतं.