Ajit Pawar: दादांचा सच्चा कार्यकर्ता! अजित पवार मुख्यमंत्री व्हावेत म्हणून...; आता निधनानंतर केलं मुंडन

Ajit Pawar: दिवंगत अजित पवार यांनी आजवर ६ वेळा महाराष्ट्राचं उपमुख्यमंत्रीपद भुषवलं आहे. पण त्यांचं मुख्यमंत्रीपदाचं स्वप्न अधुरंच राहील. त्यांच्या एका सच्च्या कार्यकर्त्यानं तर अजितदादा मुख्यमंत्री व्हावेत यासाठी एक संकल्पही केला होता. पण दादांच्या अचानक जाण्यामुळं आता हे सर्वच अधुरं राहिल्यानं या कार्यकर्त्यानं आपलं मुंडन करत त्यांना अनोखी श्रद्धांजली वाहिली आहे.

कोण आहे कार्यकर्ता?

नागपूर जिल्ह्यातील उमरेडचे रहिवासी असलेले विलास झोडपे यांना अजित पवारांचे कट्टर समर्थक मानलं जातं. झोडपे हे अजितदादांचे एक निष्ठावंत कार्यकर्ते असून २०२४ च्या विधानसभा निवडणुकीपूर्वी त्यांनी एक संकल्प केला होता. 'जोपर्यंत अजित पवार मुख्यमंत्री होत नाहीत तोपर्यंत आपण डोक्यावरचे केस कापणार नाही' अशी शपथच त्यांनी घेतली होती. त्यानंतर नागपूरच्या हिवाळी अधिवेशनात जेव्हा अजितदादांना याची माहिती झाली तेव्हा या विलास झोडपे यांची भेट घेऊन त्यांना स्पष्टपणे सांगितलं होतं की, "विलास तू केस वाढवल्यानं मी मुख्यमंत्री होणार नाही. लोकशाहीत मुख्यमंत्री होण्यासाठी संख्याबळाची गरज असते, तुझ्यासारख्या कार्यकर्त्यांनी आमदार व्हायला पाहिजे. केस वाढवल्यानं तू पुरुष आहेस की स्त्री हे कळणार नाही, वरुन तेलाचा खर्चही वाढेल. यापेक्षा हे चांगलं राहिल की तू लोकांचं काम कर आणि संघटना आणखी मजबूत कर"

अत्यंदर्शन अन् मुंडन

अजितदादांची भेट घेण्यासाठी विलास झोडपे हे २८ जानेवारीला सकाळीच मुंबईला पोहोचले होते. पण काही वेळातच अजित पवारांच्या निधनाची बातमी आली. यानंतर विलास झोडपे हे थेट मुंबईहून बारामतीला पोहोचले. त्यानंतर त्यांनी आपली पत्नी आणि दोन मुलांना देखील बारामतीला बोलावून घेतलं आणि संपूर्ण कुटुंबासह अजितदादांच्या अत्यंविधीत सहभागी झाले. पण आता अजितदादाच राहिले नाहीत त्यामुळं ते मुख्यमंत्री व्हावेत म्हणून वाढवलेले केस विलास झोडपे यांनी त्यांनाच अर्पण करण्याचा निर्णय घेतला. अजित पवारांच्या पार्थिवावर अंत्यसंस्कार झाल्यानंतर बारामतीच्या नीरा नदीतच्या संगमावरच विलास झोडपे यांनी मुंडन केलं आणि दादांना अनोख्या स्वरुपाची श्रद्धांजली वाहिली.