MP Disqualification : ठाकरेंचे खासदार एकनाथ शिंदेंच्या व्यासपीठावर गेले तर अपात्र ठरणार, 'त्या' प्रकरणामुळे धाकधूक वाढली!

Uddhav Thackeray News : एकनाथ शिंदेंच्या शिवसेनेच्या वर्धापन दिना निमित्त आज फुटलेले खासदार शिदेंसोबत व्यासपीठावर उपस्थित राहिले तर ते अपात्र ठरण्याची शक्यता वर्तवली जात आहे. स्वतंत्र गट म्हणून मान्यता मिळण्याआधी अन्य पक्षाच्या व्यासपीठावर गेल्याच्या कारणाखाली त्यांची खासदारकी अपात्र ठरेल, असे घटनातज्ज्ञांचे मत आहे.

यापूर्वी समाजवादी नेते शरद यादव हे खासदार असताना विरोधी पक्षांच्या व्यासपीठावर गेले होते. त्यावेळी त्यांना खासदार म्हणून अपात्र ठरण्यात आले होते. त्यामुळे ठाकरेंचे फुटलेले खासदार आज शिंदेंच्या सोबत वर्धापन दिनाला उपस्थित दिसणार नसल्याची चर्चा आहे.

शरद यादव हे राज्यसभेच्या खासदार होते मात्र नितीश कुमार हे भाजपसोबत गेल्याने ते लालू प्रसाद यादव यांच्या व्यासपीठावर गेले होते. त्यावेळी राज्यसभा अध्यक्षांकडे नितीश कुमार यांच्या पक्षाने शरद यादव यांना अपात्र ठरवण्याची मागणी केली होती. तेव्हा शरद यादव यांना अपात्र ठरण्यात आले होते.

दरम्यान, सहा खासदारांच्या स्वतंत्र गटाला मान्यता मिळाली आहे की नाही याची अधिकृत माहिती समोर आली नाही. खासदारांनी आपला स्वतंत्र गट करण्यासंदर्भात लोकसभा अध्यक्षांना पत्र दिले होते. दरम्यान, पक्षादेश झुगारल्या बाबत शिवसेना उद्धव बाळासाहेब ठाकरे पक्षाने सहा खासदारांना कारणे दाखवा नोटीस बजावली आहे.

लोकसभा अध्यक्षांसमोर होणार परेड

मिळालेल्या माहितीनुसार, स्वतंत्र गट म्हणून मान्यता देण्यासाठी लोकसभा अध्यक्षांना पत्र देण्यात आले आहे. या पत्रातील स्वाक्षऱ्यांची खातरजमा केली जाणार आहेत. तसेच या खासदारांची परेड लोकसभा अध्यक्षांसमोर होणार आहे.