Ahmednagar : नगर जिल्हा बँकेतील पराभवानंतर राष्ट्रवादीतील अंतर्गत कलह चव्हाट्यावर

Ahmednagar Politics : अहमदनगर जिल्हा मध्यवर्ती सहकारी बँकेच्या अध्यक्षपदाची निवडणूक नुकतीच (दि.८ मार्चला) पार पडली. या निवडणुकीमध्ये जिल्हा मध्यवर्ती सहकारी बँकेच्या अध्यक्षपदी भाजपचे माजी आमदार शिवाजी कर्डिले यांची निवड झाली. तर राष्ट्रवादीचे माजी आमदार चंद्रशेखर घुले यांचा पराभव झाला.

जिल्हा मध्यवर्ती सहकारी बँकेत भाजपचे सहा संचालक आहेत. तर महाविकास आघाडीचे १४ संचालक आहेत. मात्र, पुरेसे संख्याबळ असताना देखील राष्ट्रवादीच्या उमेदवाराचा अवघ्या एका मताने पराभव झाला. त्यामुळे राष्ट्रवादीचे वरिष्ठ नेते अॅक्शन मोडवर आले आहेत.

राष्ट्रवादीच्या संचालकांचे जिल्हा मध्यवर्ती बँकेत संख्याबळ असतानाही पराभव कसा झाला? या बाबींची चौकशी करण्यात येणार असून अहवाल पक्षाच्या वरिष्ठांना पाठवण्यात येणार असल्याचे विश्वसनीय सुत्रांनी सांगितले आहे.

मात्र, या निवडणुकीच्या निमित्ताने राष्ट्रवादीतील अंतर्गत कलह चव्हाट्यावर आला आहे. या निवडणुकीमध्ये राष्ट्रवादीच्या उमेदवाराचा पराभव झाल्यानंतर राष्ट्रवादीच्या युवक आघाडीचे पदाधिकारी आक्रमक झाल्याचे पाहायला मिळाले.

राष्ट्रवादी युवक काँग्रेसचे जिल्हाध्यक्ष कपिल पवार व संजय कोळगे यांनी पत्रकार परिषद घेत राष्ट्रवादीचे जिल्हाध्यक्ष राजेंद्र फाळके आणि जिल्हा सहकारी बँकेतील फुटीर संचालकांची पक्षातून हकालपट्टी करण्याची मागणी केली.

अहमदनगर जिल्हा मध्यवर्ती सहकारी बँकेच्या अध्यक्षपदाच्या निवडीवेळी राजकीय घडामोडी घडल्या होत्या. या घडामोडी जिल्हाध्यक्ष फाळके यांना माहिती असायला हव्या होत्या.

त्यांनी या घडामोडीची माहिती वरिष्ठ नेत्यांना द्यायला हवी होती. मात्र, त्यांनी याकडे दुर्लक्ष केले, असा आरोप राष्ट्रवादी युवक काँग्रेसच्या पदाधिकाऱ्यांनी केला आहे.

दरम्यान, जिल्हा मध्यवर्ती बँकेच्या अध्यक्षपदाच्या निवडणुकीच्यानिमित्ताने राष्ट्रवादीतील अंतर्गत कलह पुन्हा एकदा चव्हाट्यावर आला आहे. त्यामुळे आता पक्षातील वरिष्ठ यावर काय भूमिका घेतात? याकडे सर्वांचे लक्ष लागले आहे.