Gulabrao Patil Politics: गुलाबरावांनी भाजप नेत्यांना खडसावले, कार्यकर्त्यांची वेळ आल्यावर युती तोडायची भाषा कशाला करता?

Gulabrao Patil News: स्थानिक स्वराज्य संस्थांच्या निवडणुकीत महायुतीत आत्तापासूनच फटाके वाजू लागले आहेत. जळगाव जिल्ह्यात भाजपने स्वबळाची तयारी सुरू केली आहे. त्यामुळे सहकारी पक्षाचे कार्यकर्त्यांत नाराजी आहे.

जळगाव जिल्ह्यातील जिल्हा परिषदेसह बहुतांशी नगरपालिका आणि जळगाव महापालिकेत भाजपचे वर्चस्व आहे. त्यामुळे जलसंपदा मंत्री गिरीश महाजन यांनी स्वबळाचे संकेत दिले आहेत. त्यामुळे युती केल्यास जागा वाटपामध्ये भाजपच्या जागा कमी होऊ शकतात.

भाजपच्या स्वबळाच्या तयारीवर पालकमंत्री गुलाबराव पाटील यांनी आपली प्रतिक्रिया दिली आहे. शिवसेना एकनाथ शिंदे पक्ष देखील स्वबळावर निवडणूक करू शकतो. मात्र भाजपच्या भूमिकेवर त्यांनी स्पष्ट शब्दात नाराजी व्यक्त केली आहे.

पालकमंत्री पाटील म्हणाले, लोकसभा, विधानसभा निवडणुकीत भाजप युतीचा आग्रह धरते. नेत्यांच्या निवडणुकीत भाजपला सहकारी पक्षांना बरोबर घ्यायचे असते. नेत्यांची निवडणूक असल्याने सरकार स्थापन करण्याची भाषा असते.

जेव्हा कार्यकर्त्यांच्या निवडणुकीची वेळ येते तेव्हा एकमेकांच्या विरोधात लढण्याची भाषा का? असा प्रश्न गुलाबराव पाटील यांनी केला. आता कार्यकर्त्यांना मोठे करण्याची वेळ आहे. अशावेळी भाजपने स्वबळाची भाषा करणे योग्य नाही.

महापालिका, जिल्हा परिषद, नगरपालिका निवडणुका या कार्यकर्त्यांना मोठे करण्याच्या असतात. त्यासाठी दोन्ही पक्षांनी थोडे मागे करून तडजोड करावी. कार्यकर्त्यांना मोठे केलेच पाहिजे. त्यात काहीच चूक नाही.

भाजप नेते बाहेर युती करायची असे बोलतात. बैठकीत मात्र स्वबळाची भाषा करतात. जे बैठकीत बोलायचे ते बाहेर सांगायचे नाही. हे नेत्यांनी जाणीवपूर्वक टाळले पाहिजे असे पाटील म्हणाले.

स्थानिक स्वराज्य संस्थांच्या निवडणुका येऊ घातल्या आहेत. त्याआधीच महायुती सरकारमधील भाजप आणि सहकारी पक्ष यांच्यात युतीच्या प्रश्नावरून मतभेद दिसू लागले आहेत. याबाबत पालकमंत्री पाटील यांनी नाव न घेता भाजप नेते आणि पक्ष दोघांनाही सौम्य भाषेत इशारा देऊन टाकला.

------