Chhagan Bhujbal News; एकनाथ शिंदे यांनी आता थांबलेलंच बरं!

नाशिक : (Nashik) कोणत्याही गोष्टीची सीमा असते. तारतम्य बाळगावं लागतं. शिवसेनेतील (Shivsena) वाद बांधावरच्या वादाच्या स्तराला गेला आहे. एकनाथ शिंदे (Eknath Shinde) यांनी आता थांबलं पाहिजे. कारण सामान्य नागरिक देखील म्हणतात, शिवसेना उद्धव ठाकरे (Uddhav Thackerey) यांचीच आहे, या शब्दात माजी उपमुख्यमंत्री छगन भुजबळ (Chhagan Bhujbal) यांनी शिवसेनेतील सद्याच्या वादावर आपली प्रतिक्रीया दिली आहे. (Chhagan Bhujbal criticize Eknath Shinde on his political steps)

निवडणूक आयोगाने शिवसेना व नाव व चिन्ह एकनाथ शिंदे गटाला दिले. त्यानंतर मुख्यमंत्री शिंदे यांच्या गटाने शिवसेनेच्या कार्यालयांचा ताबा घेण्यास सुरवात केली आहे. त्यामुळे निर्माण झालेल्या वादावर श्री. भुजबळ यांनी आपली प्रतिक्रीया दिली.

ते म्हणाले, कोणत्याही वादात किती टोकापर्यंत जायचे याला सीमा असते. त्याबाबत काही तारतम्य पाळावे लागते. सध्या तसे होताना दिसत नाही. कारण सामान्य शिवसेना कार्यकर्ताच नव्हे तर सामान्य नागरिक देखील शिवसेना कोणाची हे स्पष्टपणे सांगतो. शिवसेना उद्धव ठाकरे यांचीच आहे. त्यामुळे एकनाथ शिंदे यांनी एक सीमा निश्चित केली पाहिजे. कुठं थांबायचे हे ठरवले पाहिजे.

शिंदे गटाकडून शिवसेना ठाकरेंच्या कार्यालयावर ताबा घेण्याचे काम सुरु आहे. शिवाय शाखा, कार्यालय ताब्यात घेत असल्याचे चित्र आहे. यामुळे राजकीय वातावरण तापले आहे. या वादावर भुजबळ यांनी शिंदे गटाच्या धोरणावर टिका केली.

ते म्हणाले, गेले काही दिवस सुरु असलेले राजकारण पाहता अजूनही सहानुभूती उद्धव ठाकरे यांनाच आहे, हे या शिंदे गटाला का लक्षात येत नाही. सामान्य नागरिक देखील सांगतो की, शिवसेना बाळासाहेब ठाकरे आणि उद्धव ठाकरेंची आहे. मग हे शिंदे गटाच्या लक्षात येत नाही का?. शिंदे गटाने आता थांबले पाहिजे. शेतकऱ्याच्या बांधाला बांध असताना जशी मारामारी चालते, तसे इथे सुरू आहे?. कार्यकर्ते, नागरीकांनी हे बघायचं का? असा सवाल त्यांनी केला.

न्यायालयावर विश्वास...

न्यायालयात सुनावणी सुरु आहे. यासंदर्भात थोडाफार विश्वास न्यायालयावर आणि सरन्यायाधीश चंद्रचूड यांच्यावर आहे. त्यांनी लवकरात लवकर सुनावणी पूर्ण करावी. रोज सुनावणी होतेय, दोन पक्ष झाले. पण आता सर्वच ते घेऊन जात आहेत. उद्या मातोश्री ही बाळासाहेब ठाकरे यांची बसण्याची जागाही घेऊन जातील, हे आता थांबायला पाहीजे.