Dhule Politics : धुळे मनपाच्या विरोधी पक्षनेतेपदावरून राजकारण तापलं ; १३ नगरसेवकांच्या संख्याबळावर बंटी खोपडे दावेदार

Dhule Politics : धुळे महानगरपालिकेच्या प्रलंबित विरोधी पक्षनेतेपदावरून सध्या राजकीय वातावरण कमालीचे तापले आहे. महापालिकेची निवडणूक होऊन आठ महिने उलटले तरी विरोधी पक्षनेत्याची निवड करण्यात आलेली नाही.

न्यायालयाकडून चार आठवड्यात यासंदर्भात निर्णय घेण्याचे आदेश असून त्या पार्श्वभूमीवर धुळे शहर विकास आघाडीच्या शिष्टमंडळाने भाजपच्या महापौर मायादेवी परदेशी यांची भेट घेत उच्च न्यायालयाच्या आदेशाची प्रत आणि निवेदन साद केलं. न्यायालयाने दिलेल्या चार आठवड्यांच्या मुदतीत निर्णय न झाल्यास न्यायालयीन अवमानाची याचिका दाखल करण्याचा इशारा आघाडीने दिला आहे.

राष्ट्रवादी काँग्रेस (अजित पवार गट) , एकनाथ शिंदे यांच्या नेतृत्वातील शिवसेनेचा गट यांच्या शहर विकास आघाडीचे गटनेते शाहबाज फारूक शाह यांच्या नेतृत्वाखालील शिष्टमंडळाने महापौरांची भेट घेतली. धुळे महानगरपालिकेची स्थापना झाल्यापासून विरोधी पक्षनेतेपद रिक्त असल्याचा दावा शहर विकास आघाडीने केला आहे.

या नियुक्तीसाठी आघाडीने उच्च न्यायालयात धाव घेतली होती. न्यायालयाने गुणवत्तेच्या आधारावर चार आठवड्यांच्या आत निर्णय घेण्याचे निर्देश दिल्याचे गटनेते शाहबाज फारूक शाह यांनी सांगितले.

दरम्यान, शहर विकास आघाडीकडे १३ नगरसेवकांचे संख्याबळ असून, मनपातील दुसऱ्या क्रमांकाचा मोठा गट असल्याने दीपक सुरेश ऊर्फ बंटी खोपडे हे विरोधी पक्षनेतेपदाचे योग्य दावेदार असल्याचा दावा आघाडीने केला आहे.

निवडणूक होऊन अनेक महिने उलटले तरी विरोधी पक्षनेतेपदाचा तिढा अद्याप सुटू शकलेला नाही. न्यायालयाने दिलेल्या मुदतीत आता मनपा प्रशासन आणि माननीय महापौर या पदाबाबत काय अंतिम निर्णय घेतात, याकडे संपूर्ण धुळे राजकीय वर्तुळाचे लक्ष लागले आहे.