Rajendra Vikhe Patil News : नाशिकमध्ये नवीन ट्वीस्ट; राजेंद्र विखेंच्या फेसबुक पोस्टची चर्चा :...'पर अपनों को नही मार सकते!'

Rajendra Vikhe Patil News : नाशिक पदवीधर निवडणुकीसाठी उद्या मतदान होणार आहे. सुरुवातीपासून या मतदार संघात अनेक नाट्यमय घडामोडी घडल्या आहेत. त्यातच आता या मतदार संघात वेगळीच चर्चा रंगली आहे. राजेंद्र विखे पाटील यांनी फेसबुकवर आज (ता.२९) सायंकाळी एक पोस्ट शेअर केली आहे, त्याचे वेगवेगळे अर्थ राजकीय वर्तुळात लावले जात आहेत.

भाजपकडून राजेंद्र विखे पाटील (Rajendra Vikhe Patil) यांच्या नावाची चर्चा सुरु होती. मात्र, नाशिक पदवीधरमध्ये भाजपने (BJP) कोणालाच उमेदवारी दिली नाही. राजेंद्र विखे यांनी या मतदार संघात मोठ्या प्रमाणात काम केले होते. पक्षाने त्यांना आधी मतदार नोंदणी करण्यास सांगितले होते. त्यानुसार त्यांनी मोठ्या प्रमाणात मतदार नोंदणी केली. त्यानंतर पक्षाने त्यांना उमेदवारी संदर्भात विचारणाच केली नसल्याची चर्चा होती.

नाशिकमध्ये आपला उमेदवार न देता, सत्यजीत तांबे यांना छुपा पाठिंबा देण्याचा निर्णय भाजपने घेतला आहे. या संदर्भात राज्याचे महसुल मंत्री राधाकृष्ण विखे पाटील (Radhakrishna Vikhe Patil) यांनी थेट तांबे यांना पाठिंबा दिला नाही. मात्र, स्थानीक पातळीवर तांबे यांचे काम भाजपचे पदाधिकारी करत असल्याचे सांगितले.

त्यानंतर राजेंद्र विखे पाटील यांनी फेसबुकवर एक पोस्ट शेअर केली आहे. त्यामध्ये ते म्हणाले, ''शतरंज का एक नियम बहुत उम्दा है, चाल कोई भी चलो पर अपनों को नही मार सकते!'' असे राजेंद्र विखे यांनी म्हटले आहे. त्यामुळे मतदार संघात एकच चर्चा रंगली आहे.

भाजपने थेट आपला उमेदवार मैदानात न उतरवता सत्यजीत तांबे यांना अप्रत्यक्ष पाठिंबा दिला आहे. त्यामुळे राजेंद्र विखे यांचे आमदार होण्याचे स्वप्न अजुन तरी अपूर्णच राहिले आहे. या मतदार संघात विखे विरुद्ध तांबे असा सामना होईल, असे सांगितले जात होते. मात्र, विखे यांचे कट्टर विरोधक तांबे यांनाच भाजपने स्थानिक पातळीवर पाठिंबा दिला.

त्यामुळे मतदार संघातील सर्वच गणिती बदली आहेत. उद्या मतदान असताना राजेंद्र विखे यांनी शेअर केलेल्या पोस्टचा अर्थ काय? अशी चर्चा सुरु आहे. सत्यजीत तांबे यांच्या समोर महाविकास आघाडीच्या उमेदवार शुभांगी पाटील यांनी तगडे आव्हान उभे केले आहे. त्यामुळे विखे यांनी नोंदणी केलेल्या ४० हजार मतांची तांबे यांना गरज आहे. असे असताना राजेंद्र विखे यांच्या मनात नेकमके काय आहे, अशी चर्चा सुरु झाली आहे. तसेच या फेसबुक पोस्ट मागे विखे पाटील घराण्यातील अंतर्गत नाराजी तर नाहीना अशी चर्चा होऊ लागली आहे.