एकनाथ खडसेंनी दूध संघात निवडून येऊन दाखवावे

जळगाव : राज्याचे माजी मंत्री व राष्ट्रवादी (NCP) कॉंग्रेसचे आमदार एकनाथराव खडसे (Eknath Khadse) यांनी जिल्हा दूध संघाच्या (Milk federation) यंदाच्या निवडणूकीत निवडून येऊन दाखवावे. त्यांचा पराभव अटळ आहे. त्यांचे कारनामे लवकरच बाहेर येतील, असे राज्याचे ग्रामविकास मंत्री व भाजप (BJP) नेते गिरीश महाजन (Girish Mahajan) यांनी पत्रकारांना सांगितले. (Girish mahajan given challange to NCP leader Eknath Khadse)

जळगाव जिल्हा दूध संघाची निवडणूक प्रक्रिया सुरु आहे. त्यात एकनाथ खडसे यांच्या विरोधात भाजपचे मंत्री व विरोधक गिरीश महाजन तसेच भाजप व एकनाथ शिंदे गटाच्या नेत्यांनी मोर्चेबांधणी केली आहे.

यासंदर्भात मंत्री महाजन जळगाव येथे पत्रकारांशी बोलत होते. ते म्हणाले, की एकनाथ खडसे यांनी अनेक कारनामे केले आहेत. त्यांनी आपल्यावर खोटा गुन्हाही दाखल केला आहे, असे अनेक कारनामे लवकरच बाहेर येतील.

एकनाथ खडसे यांनी कायद्याचा एवढा खोटा आधार घेतला आहे. आता आमची वेळ आली आहे. त्यांनी कायद्याला सामोरे जावे. जिल्हा दूध संघाचीही चौकशी सुरू आहे. त्यांनी पाच वर्षांत तेथे काय केले, काय नाही केले, हेही लवकरच जनतेसमोर येईल.

आम्ही त्यांच्यासारखा एकही खोटा गुन्हा दाखल करणार नाही. जिल्हा दूध संघाच्या संचालकपदाच्या निवडणुकीबाबतही श्री. महाजन यांनी श्री. खडसे यांना आव्हन दिले. श्री. खडसे आमच्या उमेदवारांवर आक्षेप घेत आहेत. ते म्हणतील तो उमेदवार आपण त्यांच्याविरोधात देऊ. त्यांनी निवडून येऊन दाखवावे, असे खुले अवाहनही श्री. महाजन यांनी खडसे यांना दिले.