Teacher Transfer Scam : राज्यातील जिल्हा परिषदांच्या शाळांमधील जिल्ह्यांतर्गत शिक्षक बदली प्रक्रियेतून सूट मिळावी किंवा मनाजोगी शाळा मिळावी यासाठी विविध आजारांची किंवा दिव्यांगांची खोटी प्रमाणपत्रे सादर करणे आता शिक्षकांना परवडणार नाही.
शिक्षकांनी खोटेपणा केल्यास, त्याला त्याची गंभीर शिक्षा मिळेल, अशी कठोर भूमिका ग्रामविकास विभागाने घेतली आहे. शिक्षकांनी बदली टाळण्यासाठी खोटी प्रमाणपत्र दिल्यास संबंधितावर थेट फौजदारी कारवाई करण्याचा आदेश ग्रामविकास विभागाने दिला आहे.
राज्यातील जिल्हा परिषदांच्या शाळांमधील (School) जिल्ह्यांतर्गत शिक्षक बदली प्रक्रियेत, बदलीतून सूट मिळावी यासाठी विविध प्रमाणपत्र सादर करत आहेत. ही प्रमाणपत्रे खोटी असल्याच्या तक्रारी होत आहे. या बदल्या प्रक्रियेमध्ये 'यूडायस'च्या आकडेवारीवरून राज्यातील 43 हजार 566 शिक्षकांनी ‘दिव्यांग’, ‘आजारी’ असल्याचं समोर आलं आहे.
बदली रद्दसाठी शिक्षकांनी (Teacher) सादर केलेल्या आजारपणाच्या अन् दिव्यांगांच्या प्रमाणपत्रांची ग्रामविकास विभागानं गंभीर दखल घेतली आहे. त्यामुळे आता शिक्षकांनी सादर केलेले अपंगत्व प्रमाणपत्र, आजार प्रमाणपत्र, तसेच आवश्यकता भासल्यास शिक्षकांचीही जिल्हा शल्यचिकित्सकांकडून तपासणी करण्यात येणार आहे. त्यात अनियमितता आढळल्यास संबंधित शिक्षकांवर फौजदारी गुन्हे, निलंबन अशी कारवाई करण्याचा आदेश ग्रामविकास विभागाने दिला आहे.
राज्यातील 1 लाख 83 हजार 996 जिल्हा परिषद शिक्षकांनी गेल्या महिन्यात बदली पोर्टलवर आपले ‘प्रोफाईल’ अद्ययावत केले आहेत. संवर्ग एक आणि संवर्ग दोनमधील शिक्षकांच्या कागदपत्रांची पडताळणी प्रशासकीय पातळीवर सुरू करण्यात आली आहे. संवर्ग एकमधून बदली मिळविण्यासाठी किंवा बदलीतून सूट मिळविण्यासाठी 43 हजारांवर शिक्षकांनी अर्ज भरल्याची माहिती पुढे आली आहे.
जिल्हा परिषद शिक्षकांच्या जिल्ह्यांतर्गत बदली धोरणातील विशेष संवर्ग एकमध्ये प्रामुख्याने दिव्यांग शिक्षक, गंभीर आजाराने ग्रस्त असलेले शिक्षक, तसेच वयाची 53 वर्षे उलटलेल्या शिक्षकांचा समावेश आहे. तसेच विधवा, कुमारिका शिक्षक, तसेच ज्या शिक्षकांचा जोडीदार गंभीर आजाराने त्रस्त आहे, अशा शिक्षकांचा समावेश आहे.
राज्यातील लांबलेल्या बदल्याच्या प्रक्रियेत मनाजोगी शाळा मिळावी किंवा असलेली जागा कायम राहावी, यासाठी शिक्षकांनी 'फिल्डिंग' लावली आहे. मनाजोगी शाळेसाठी राज्यातील 43 हजार 566 शिक्षकांनी ‘दिव्यांग’, ‘आजारी’ असल्याचा दावा केला आहे. परंतु या आकडेवारीमुळे राज्यातील शाळांचे ‘आरोग्य’ चर्चेत आले आहे.
बदलीतून सूट मिळावी यासाठी खोटी प्रमाणपत्रे सादर करण्यात आल्याचे काही प्रकार उघडकीस आले आहेत. या पार्श्वभूमीवर, राज्य सरकारच्या ग्रामविकास विभागाने जिल्हा परिषदांच्या मुख्य कार्यकारी अधिकाऱ्यांना मुख्य कार्यकारी अधिकाऱ्यांना परिपत्रकाद्वारे सूचना दिल्याने शिक्षकांमध्ये खळबळ उडाली आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.