एकनाथ खडसे, अहो १५ वर्षे लाल दिवा अन् १२ खाती तरीही मतदारसंघ भकास?

नाशिक : तुमच्याकडे १५ वर्षे लाल दिवा अन् बारा खात्यांचा कारभार होता. त्याचा काय उपयोग केला? मतदारसंघाचा विकास का करता आला नाही?. याच चुकीची शिक्षा लोकांनी तुम्हाला दिली आहे, तुम्ही तीच शिक्षा सध्या भोगत आहात, अशा आक्रमक शब्दात भाजप नेते गिरीश महाजन (Girish Mahajan) यांनी आज राष्ट्रवादी काँग्रेसचे नेते एकनाथ खडसे (Eknath Khadse) यांच्यावर तोफ डागली.

नगर पंचायतीच्या निवडणुकीचा प्रचार आज शिगेला पोहोचला. यासंदर्भात बोदवड येथे झालेल्या सभेत श्री. महाजन बोलत होते. त्यांनी भाजपचे उमेदवारच विजयी होतील असा दावा केला. ते म्हणाले, एकनाथ खडसे मुख्यमंत्री पदाच्या शर्यतीत सहभागी होतो. मुख्यमंत्री पदासाठी पळतो. मात्र स्वतःचा मतदारसंघ भकास. मतदारसंघाची अवस्था काय आणि स्वतःला मोठे नेते म्हणायचे? अशी खिल्ली त्यांनी उडवली.

ते पुढे म्हणाले, १५ वर्षे तुमच्याकडे लाल दिवा होता. बारा खाते होते. तरीही जर मतदारसंघाचा विकास करता आला नसेल तर काय म्हणायचे. तुमच्या चुकीच्या वागणुकीमुळे मतदारसंघातील जनतेने तुम्हाला शिक्षा दिली. लल्लु पंजू सारखे लोक कमिशनसाठी भांडतात मग विकास कसा होणार?. त्यामुळे आता कितीही आवाज चढवला तरीही तुमची धार बोथट झाली आहे. तुमचे आता काही खरे नाही. त्यामुळे तुमचे दुकान बंद करा.

श्री. महाजन यांनी राज्यातील महाविकास आघाडी सरकारवर देखील टिका केली. शेतकऱ्यांना नुकसान भरपाई अद्याप मिळालेली नाही. या सरकारने सगळ्यांच्याच तोंडाला पाने पुसली. गरीब नागरिक रेशन कार्डपासून वंचित तर श्रीमंताची नावे रेशन कार्डवर अशी स्थिती आहे. गेल्या दोन वर्षात एकही भरती झालेली नाही. जी भरती झाली त्यात भ्रष्टाचार झाला. म्हाडा असो की सारव्जनिक आरोग्य विभाग त्यात घोटाळे झाले. बोदवड सारख्या शहरात पिण्याच्या पाण्याचे हाल असतात. मग विकास कसा करणार.

....