Girish Mahajan Politics: सहा वेळा निवडून येण्याचे रहस्य काय?, मंत्री गिरीश महाजन यांनी उलगडले रहस्य..

Rahul Dhikle News: भारतीय जनता पक्षाचे नेते आणि ग्रामविकास मंत्री गिरीश महाजन सातव्यांदा निवडणुकीला सामोरे जात आहेत. जामनेर मतदार संघात मंत्री महाजन यांच्या विरोधात पूर्वाश्रमीचे भाजप नेते दिलीप खोडपे हे उमेदवारी करीत आहेत. श्री. महाजन यांनी निवडणूक जिंकण्याचे रहस्य काय, हे सांगितले.

नाशिक पूर्व मतदार संघातील उमेदवार आमदार राहुल ढिकले यांच्या प्रचार कार्यालयाचे उद्घाटन मंत्री गिरीश महाजन यांच्या उपस्थितीत झाले. यावेळी महाविकास आघाडीचे विविध पदाधिकारी आणि नेते उपस्थित होते. यावेळी मंत्री महाजन यांनी विधानसभा निवडणूक जिंकण्याचे रहस्य उलगडून दाखवले.

मंत्री गिरीश महाजन म्हणाले, पूर्व मतदारसंघात गेल्या निवडणुकीत माजी आमदार बाळासाहेब सानप आणि राहुल ढिकले यांच्यात लढत झाली. त्यावेळी आमदार ढिकले अल्प आघाडीने निवडणूक जिंकले. यंदाही पुन्हा तशीच लढत होत आहे. माजी आमदार सानप यंदाही इच्छुक होते.

उपमुख्यमंत्री देवेंद्र फडणवीस आणि आम्ही चर्चा केल्यानंतर आमदार ढिकले यांना उमेदवारी देण्याचा निर्णय घेतला. त्याला मुख्य कारण आमदार ढिकले हे जनसामान्यांमध्ये वावरणारे आहेत. लोकांशी त्यांचा मोठा संपर्क आहे. त्यामुळेच ते यंदा किमान पन्नास हजारांच्या आघाडीने विजयी होतील, असा दावा त्यांनी केला.

यावेळी मंत्री महाजन यांनी आपण गेली सहा टर्म जामनेर मतदार संघातून विजयी झालो. यंदा सातव्यांदा मी आमदार होणार आहे. त्याचे मुख्य कारण मी पाच वर्ष लोकांमध्ये वावरतो. त्यांच्या सुख दुःखात सहभागी होतो. त्यांचे सर्व प्रश्न सोडवतो. त्यामुळे निवडणुकीच्या कालावधीत मतदारांना उमेदवार आपल्या घरी आला पाहिजे, अशी मतदारांची अपेक्षाच नसते.

मी सध्या उमेदवार असलो तरी मतदारसंघात गेलेलो नाही. धुळे, नाशिक, नांदेड, जालना, कोपरगाव अशा विविध मतदारसंघांमध्ये फिरत आहे. नाशिक पूर्व चे उमेदवार राहुल ढिकले हे देखील अशाच प्रकारे लोकांमध्ये वावरतात. त्यामुळे ते यंदा पन्नास हजार मताधिक्क्याने विजयी होतील, असा दावा त्यांनी केला.

महाजन म्हणाले, पाच वर्षे तुम्ही लोकांमध्ये गेला नाही. गाडीच्या काचा खाली केल्या नाही. गाडीच्या काचेला काळी फिल्म लावली. तर मग पाच वर्षांनी मतदार देखील तुम्हाला टाटा, बाय-बाय करतात. तुमच्यासाठी दरवाजे, खिडक्या लावून घेतात.

------