Gulabrao Devkar : घड्याळ हातात घातलं, पण संकट टळलं नाही ! गुलाबराव देवकर 10 कोटींच्या कर्ज प्रकरणात दोषी

Maharashtra politics : शरद पवार यांची साथ सोडून काही दिवसांपूर्वी अजित पवार यांचे घड्याळ हाती घातलेले राष्ट्रवादी काँग्रेसचे नेते तथा माजी मंत्री गुलाबराव देवकर हे कर्जप्रकरणात अडचणीत आले आहेत. देवकर यांनी जळगाव जिल्हा सहकारी बँकेतून त्यांच्या अध्यक्षपदाच्या कार्यकाळात दहा कोटींचे नियमबाह्य कर्ज घेतले आहे. त्यांच्याच 'श्रीकृष्ण शैक्षणिक व सांस्कृतिक मंडळ' या संस्थेला 10 कोटी रुपयांचे कर्ज दिल्याप्रकरणी चौकशी समितीने त्यांना दोषी ठरवले आहे.

नाबार्डच्या तपासणी अहवालात नमूद करण्यात आले आहे की, देवकर यांच्या संबंधित संस्थेला कर्ज मंजूर करताना बँकिंग रेग्युलेशन ॲक्टचे उल्लंघन झाले आहे. या पार्श्वभूमीवर, त्यांच्याकडून संपूर्ण कर्जाची तातडीने वसुली करण्यात यावी, असा अहवाल धुळे जिल्हा उपनिबंधक मनोज चौधरी यांनी नाशिक सहनिबंधकांना दिला आहे.

या प्रकरणी 24 जानेवारी 2025 रोजी धरणगाव तालुक्यातील झुरखेडा येथील विविध कार्यकारी सेवा सहकारी सोसायटीचे संचालक एस. जी. पाटील यांनी तक्रार दाखल केली होती. गुलाबराव देवकर हे जळगाव जिल्हा मध्यवर्ती सहकारी बँकेचे चेअरमन होते. तेच 'श्रीकृष्ण शैक्षणिक व सांस्कृतिक मंडळ' या संस्थेचेही अध्यक्ष होते. बँकिंग नियमांनुसार, कोणत्याही संचालकाला किंवा त्यांच्याशी संबंधित हितसंबंध असलेल्या संस्थेला कर्ज देण्यास प्रतिबंध असतानाही, देवकर यांनी आपल्या पदाचा गैरवापर करून त्यांच्या संस्थेसाठी 10 कोटी रुपयांचे कर्ज घेतल्याचा आरोप पाटील यांनी केला होता.

त्यानंतर सहनिबंधकांनी धुळे जिल्हा उपनिबंधकांना सुनावणी घेऊन चौकशीचे आदेश दिले होते. धुळे जिल्हा उपनिबंधकांनी तब्बल चार वेळा या प्रकरणी सुनावणी घेतली. तक्रारदारांच्या अर्जातील मुद्दे, सुनावणीवेळी सादर केलेली कागदपत्रे, निबंधकांनी मंजूर केलेला उपविधी, सनदी लेखापाल यांचा वैधानिक लेखापरीक्षण अहवाल व नाबार्ड च्या तपासणी अहवालाच्या आधारे त्यांनी सदरचा अहवाल दिला.

यासंदर्भात गुलाबराव देवकर यांनी प्रतिक्रिया दिली असून धुळे जिल्हा उपनिबंधकांनी काय अहवाल दिला मला माहित नाही. मात्र जे कर्ज मी घेतले होते, ते नियमानुसारच आहे. त्याची वेळोवेळी परतफेड करीत आहे. कर्जाचा विषय काही अडचणीचा नाही. असे गुलाबराव देवकर यांनी म्हटले आहे.

नाबार्ड'च्या तपासणी अहवालातील नमूद शेऱ्यानुसार कर्जदार संस्थेने कर्ज देताना बँकिंग रेग्युलेशन ॲक्ट १९४९ मधील कलम २० चे उल्लंघन झाल्याचे नमूद आहे. त्यानुसार सर्व बाबींची तपासणी करून अहवाल नाशिक विभागीय सहनिबंधकांकडे सादर केला आहे. अशी माहिती धुळे जिल्हा उपनिबंधक मनोज चौधरी यांनी दिली आहे.

गुलाबराव देवकरांना पक्षात घेऊ नका असे आवाहन गुलाबराव पाटील यांनी अजित पवार यांना केलं होतं. देवकरांना महायुतीत घेण्यास गुलाबराव पाटलांचा तीव्र विरोध होता. मात्र तरीही त्यांचा पक्षप्रवेश झाला. एकीकडे महायुतीत जिल्ह्यातीलच नेत्यांकडून विरोध व दुसरीकडे चौकशी अहवालात दोषी आढळल्याने गुलाबराव देवकर यांच्या राजकीय भवितव्यावर प्रश्नचिन्ह निर्माण झाले आहे. या अहवालामुळे गुलाबराव देवकर यांच्यावर आता कायदेशीर आणि प्रशासकीय कारवाई होण्याची शक्यता बळावली आहे