Nashik politics: मुसळधार पावसाने चारही मंत्र्यांची उडवली झोप! भुजबळांच्या मतदारसंघात प्रचंड नुकसान

Nashik Heavy Rains News : नाशिक जिल्ह्यात यंदा तिसऱ्यांदा अतिवृष्टी झाली आहे. जिल्ह्यातील 98 महसूल मंडळात अतिवृष्टी झाल्याची नोंद आहे. जिल्ह्यातील खरीप पिके दुसऱ्यांदा पाण्याखाली गेली. यापूर्वी केलेल्या पेरण्या आणि त्यावरील शेतकऱ्यांचा खर्च वाया गेला. राज्य शासन आणि स्थानिक लोकप्रतिनिधी आमदार, मंत्र्यांवर नाराजी आहे.

अन्न व नागरी पुरवठा मंत्री छगन भुजबळ यांच्या येवला मतदार संघात प्रचंड हानी झालू असून शेतीचे मोठे नुकसान झाले आहे. नरहरी झिरवाळ, माणिकराव कोकाटे, दादा भुसे आणि छगन भुजबळ हे चार मंत्री नाशिक जिल्ह्यात आहेत. मात्र, गेल्या महिन्यात अतिवृष्टीने झालेल्या नुकसानीचे पंचनामे अद्याप पूर्ण झालेले नाही.

गेल्या महिन्यात झालेल्या नुकसानीचे पंचनामे झालेले नसताना पुन्हा पावसाचा धडाका सुरू आहे. त्यामुळे शेतकरी चिंतेत आहे. कर्जमाफीच्या आणि नुकसानग्रस्तांच्य मदतीसाठी विरोधी पक्ष आक्रमक झाला आहे. राष्ट्रवादी काँग्रेस शरदचंद्र पवार पक्षाने शेतकरी आक्रोश मोर्चा काढून राज्य शासनाविरोधात प्रचंड शक्ती प्रदर्शन केले होते. शिवसेना उद्धव बाळासाहबे ठाकरे पक्षानेही राज्य शासनाला शेतकऱ्यांच्या प्रश्नांवर इशारा दिला होता.

नाशिक जिल्ह्यात द्राक्ष उत्पादक अतिवृष्टीने मोठ्या संकटात सापडले आहेत. कांदा पीक यापूर्वीच केंद्र शासनाच्या धोरणाने संकटात सापडले आहे. उत्पादकांचे आर्थिक नुकसान झाल्याने राज्य शासनाविरुद्ध संतापाचे वातावरण आहे. शनिवारी सायंकाळपासून जिल्ह्यात अतिवृष्टी सुरू आहे. गोदावरीसह सर्व प्रमुख नद्यांना पूर आला आहे. मुख्य म्हणजे छगन भुजबळ यांचा मतदारसंघ असलेल्या येवला मतदारसंघात दुष्काळी भागातील नद्यांना ही पूर आला. या पुराने शेती नष्ट झाली आहे.

शेतकरी संतप्त

अतिवृष्टीमुळे शेतकऱ्यांचे पीक गेले आहे. मात्र, पंचनामे आणि मदत शेतकऱ्यांना अद्यापही मिळालेली नाही. नाशिक जिल्ह्यात चार मंत्री असताना मदतीला होत असलेल्या उशीरामुळे शेतकरी संतप्त झाले आहेत. त्यात विरोधक आक्रमक झाले असून सरकारने तातडीने कर्जमाफी करून मदत द्यावी, या मागणीसाठी राजकारण तापले आहे.