Jalgaon Mayor Election: महापौर पदाचा तिढा वाढला; गिरीश महाजन यांच्याकडे जोरदार लॉबिंग!

Jalgaon BJP News: जळगाव महापौर पदाची निवडणूक येत्या 6 फेब्रुवारीला होत आहे. त्याची प्रक्रिया सुरू झाली आहे. मात्र पक्षात एकमत होत नसल्याने अस्वस्थता वाढली आहे.

जळगाव महापालिकेच्या महापौर पदाच्या निवडणुकीची प्रक्रिया सुरू झाली आहे. बुधवारी अर्ज देण्याची प्रक्रिया सुरू झाली. मात्र अद्याप कोणीही अर्ज नेलेला नाही. भाजप पक्षात याबाबत निर्णय होऊ शकला नाही.

जलसंपदा मंत्री गिरीश महाजन यांची भूमिका उमेदवार निश्चित करण्यात महत्त्वाचे आहे. गेले दोन दिवस मंत्री महाजन विविध कार्यक्रमांमध्ये व्यस्त आहेत. त्यामुळे ते जळगावला उपलब्ध होऊ शकलेले नाहीत.

महापौर पदाच्या अर्ज नेण्यासाठी उद्या शेवटचा दिवस आहे. अद्याप पर्यंत एकाही इच्छुकाने उमेदवारी अर्ज लिहिलेला नाही. भारतीय जनता पक्षात इच्छुकांकडून उमेदवारीसाठी जोरदार सामाजिक लॉबिंग सुरू झाले आहे.

जळगाव महापालिकेत भाजपचे सर्वाधिक ४६ नगरसेवक आहेत. महापौर पद भाजपकडे तर शिवसेना एकनाथ शिंदे पक्षाकडे उपमहापौर पद जाण्याची शक्यता आहे. महापौर पद ओबीसी महिला प्रवर्गासाठी राखीव आहे.

सध्या भाजपकडून दीपमाला काळे आणि उज्वला बेंडाळे यांची नावे आघाडीवर आहेत. मराठा समाजातील वैशाली पाटील यांचेही नाव चर्चेत आहे. महापौर पदासाठी लेवा पाटील समाज आणि मराठा या दोन्ही समाजांना संधी देण्याचा प्रयत्न आहे. त्यामुळे मोठा सामाजिक राजकीय पेच निर्माण झाला आहे.

मराठा आणि लेवा पाटील या दोन्ही समाजांच्या नेत्यांनी महापौर पदाच्या उमेदवारीसाठी लॉबिंग सुरू केले आहे. मंत्री गिरीश महाजन यांच्याकडे उमेदवारीसाठी जोरदार फिल्डिंग सुरू आहे. त्यामुळे भाजप पक्ष स्तरावर निर्णय होऊ शकलेला नाही. आज याबाबत कोणत्याही स्थितीत उमेदवारीचा निर्णय घ्यावा लागेल. कोणाला संधी मिळेल याची उत्सुकता वाढली आहे.