BJP Politics : ठाकरे बंधू एकत्र येणार का? बावनकुळे म्हणतात, "पुढच्या आठवड्यात मी राज ठाकरेंकडे चहाला जाणार अन्..."

Nashik News, 25 May : आगामी स्थानिक स्वराज्य संस्थांच्या निवडणुका महायुतीने गांभीर्याने घेतल्या आहेत. याच पार्श्वभूमीवर तिन्ही घटक पक्ष एकत्रितपणे निवडणुकीला सामोरे जातील असा दावा भाजपचे प्रदेश अध्यक्ष चंद्रशेखर बावनकुळे यांनी केला आहे.

त्यामुळे राष्ट्रवादी काँग्रेस व शिवसेनेच्या स्वबळाची घोषणा किती काळ टिकणार याची चर्चा आहे. शिवसेना पक्षप्रमुख उद्धव ठाकरे आणि मनसे पक्षप्रमुख राज ठाकरे हे दोघे एकत्र येणार ही चर्चा गेले काही दिवस सुरू आहे. या माध्यमातून राज्याच्या राजकारणात मोठ्या घडामोडी अपेक्षित आहेत.

या पार्श्वभूमीवर दोन्ही ठाकरे बंधू आणि त्यांची भूमिका यावर भाजपचे प्रदेशाध्यक्ष चंद्रशेखर बावनकुळे यांनी भाष्य केले आहे. बावनकुळे म्हणाले, उद्धव ठाकरे आणि राज ठाकरे या दोघांचेही पक्ष स्वतंत्र आहेत. त्यामुळे एकत्र येण्याबाबत काय भूमिका व धोरण असेल हे त्यांनाच ठरवावे लागेल. याबाबत बऱ्याच गोष्टी अद्याप जाहीर झालेल्या नाहीत.

त्यामुळे यावर कोणतेही भाष्य करणे योग्य नाही. एकत्र आले किंवा नाही आले तरीही महायुतीवर त्याचा काहीही परिणाम होणार नाही असा दावा त्यांनी केला. राज ठाकरे यांच्याकडे अनेक नेते भेट घेण्यासाठी जातात. त्यावरून राजकीय बातम्या चर्चेत असतात. मात्र, अनेक नेते भेटीला गेले म्हणजे त्यात राजकीय चर्चा झालीच असे होत नाही. मी देखील पुढच्या आठवड्यात राज ठाकरे यांच्याकडे चहाला जाणार आहे, असे बावनकुळे म्हणाले.

जिल्हा परिषद महापालिका आणि स्थानिक स्वराज्य संस्थांच्या निवडणुकीची प्रक्रिया निवडणूक आयोगाने सुरू केली आहे. उच्च न्यायालयाच्या निकालाप्रमाणे ही प्रक्रिया निश्चित कालावधीत पूर्ण केली जाईल. त्यामुळे आता कोणतीही यंत्रणा किंवा कोणीही या निवडणुका स्थगित करू शकत नाही. त्यापुढे ढकलल्या जाण्याची देखील शक्यता नाही, असंही बावनकुळे म्हणाले.

महापालिका निवडणुकांमध्ये महायुती एकत्र निवडणुकांना सामोरे जाणार आहे. यासंदर्भात तिन्ही घटक पक्षांच्या नेत्यांची प्राथमिक चर्चा झाली आहे. या निवडणुकांमध्ये महायुतीचा धर्म सगळ्यांना पाळावाच लागेल. याबाबत अन्य कोणत्याही बातम्या असल्या तरी त्यात काहीही तथ्य नाही, असा दावा बावनकुळे यांनी केला.