Malegaon Blast Case : मालेगाव बॉम्बस्फोट खटल्यात पोलिसांनी पुरावेच सादर केले नाही, प्रकाश आंबेडकरांचा गंभीर आरोप

Prakash Ambedkar News : वंचित बहुजन आघाडीचे नेते ॲड. प्रकाश आंबेडकर यांनी मालेगाव बॉम्बस्फोट प्रकरणात पोलिस तपास आणि राज्य शासनाची भूमिका गंभीर प्रश्नचिन्ह उपस्थित केले आहेत. मालेगाव खटल्यातील सर्व आरोपी निर्दोष सुटले. त्याला एक महिना उलटला. मात्र, अद्यापही सर्वोच्च न्यायालयात दाद मागण्यात आलेली नाही याकडे त्यांनी लक्ष वेधले.

मालेगाव बॉम्बस्फोट खटल्यात पोलिसांची कामगिरी आणि त्यात राज्य शासनासह अन्य यंत्रणांचा हस्तक्षेप असल्याची चर्चा आहे. मालेगाव बॉम्बस्फोटाच्या खटल्यातील मूळ पुरावे आणि महत्त्वाचे दस्तऐवज पोलिसांनी न्यायालयापुढे सादर केले नाहीत, असा धक्कादायक आरोप देखील त्यांनी केला. आंबेडकर यांनी शनिवारी मालेगाव येथे 2008 बॉम्बस्फोटातील पीडित कुटुंबियांशी भेट घेतली. त्यावेळी ते बोलत होते.

महाराष्ट्र शासनाने ज्या पद्धतीने मुंबई ट्रेन बॉम्बस्फोटानंतर सुप्रीम कोर्टात जाण्याचा निर्णय घेतला होता, त्या पद्धतीने या प्रकरणात शासनाने कोर्टात गेले पाहिजे. मुंबई बॉम्बस्फोट खटल्यातील तपासात देखील अशाच त्रुटी होत्या. त्यामध्ये निरपराध नागरिकांना गोवण्यात आले होते. त्यामुळेच न्यायालयात ते प्रकरण टिकले नाही. त्यातील आरोपी निर्दोष सुटले, असे ते म्हणाले.

मुंबई बॉम्बस्फोट खटल्याबाबत निकालाच्या दुसऱ्याच दिवशी शासनाकडून सर्वोच्च न्यायालयात अपील दाखल करण्यात आले. मालेगाव खटल्यात मात्र निकालाला एक महिना होऊ नये अद्याप अपील दाखल करण्यात आलेले नाही. त्यामुळे मालेगाव प्रकरणात पिडीतांना न्याय मिळणार की नाही असा प्रश्नही आंबेडकर यांनी उपस्थित केला.

मालेगाव प्रकरणात सर्व आरोपी निर्दोष सुटले. पोलिस तपासातील त्रुटी आणि गोंधळाचे प्रतीक आहे. आरोपी निर्दोष असतील तर बॉम्बस्फोट घडवला कोणी हा गंभीर प्रश्न शिल्लक राहतो. केंद्र आणि राज्य सरकारमुळे या खटल्याच्या निकालाची दिशा बदलली, असा आरोप आंबेडकर यांनी केला.