K. C. Padavi Vs Vijayakumar Gavit: आजी-माजी आदिवासी विकास मंत्री व्यासपीठावरच भिडले; नेमकं काय झालं?

सागर निकवाडे

Nandurbar: नंदुरबार जिल्हा नियोजन समितीच्या बैठकीत आजी-माजी आदिवासी विकास मंत्र्यांमध्ये शाब्दीक चकमक उडाली. व्यासपीठावर बसलेले हे दोन्ही नेते थेट अरेतुरे अन् हमरीतुमरीच्या भाषेवर आल्याने गोंधळ उडाला. भाजपचे विद्यमान आदिवासी विकासमंत्री डॉ. विजयकुमार गावित आणि काँग्रेसचे आमदार, माजी आदिवासी विकास मंत्री के. सी. पाडवी यांच्यात हा वाद झाला.

जिल्हा नियोजन समितीचा आदिवासी उपयोजनेचा निधी जिल्हा परिषद मार्फत खर्च व्हावा, असे आदिवासी विकास विभागाने परिपत्रक काढले आहे का? अशी विचारणा आमदार के. सी. पाडवी यांनी जिल्हा नियोजन समितीच्या सभेत पालकमंत्र्यांना केली.यावर उत्तर देतांना मी संबधीत विभागाच मंत्री आहे, असे परिपत्रक काढले असेल तर सभागृहाला दाखवा अथवा खोट बोलू नका, असे डॉ. विजयकुमार गावितांनी सांगितले.

दोघांमध्ये काही काळ चांगलीच हमरीतुमरी झाली. ऐरवी शांत राहणारे हे दोन्ही नेते पहिल्यांदाच भिडले. त्यामुळे काहीकाळ उपस्थितांची चांगलीच धावपळ उडाली. यावर पालकमंत्री अनिल पाटील यांनी मध्यस्थी करुन दोन्ही नेत्यांना शांत केले.

विजयकुमार गावितांची मुलगी जिल्हा परिषद अध्यक्ष असल्याने त्यांनी असे केल्याचा संशय आल्यानचे आमदार के.सी. पाडवींनी याबाबत विचारणा केली. त्यातच के. सी पाडवी यांचा मुलगा गोवाल पाडवी यांनी नुकत्याच झालेल्या लोकसभा निवडणूकीत डॉ. विजयकुमार गावितांची कन्या हिना गावित यांचा पराभव केला आहे. त्यामुळे त्याच्या जखमेवर मीठ चोळले गेल्यानेच त्यांनी असे रुद्ररुप धारण केल्याचे आमदार के.सी पाडवी म्हणाले.

खोटे बोलून लोकांची दिशाभुल करण्याचा कार्यक्रमच काँग्रेसने सुरु केला असून मी सहअध्यक्ष असल्याने आणि सोबतच माझ्या विभागाशी निगडीत झालेला आरोप असल्याने मी त्यावर उत्तर देणे माझे काम असल्याचे डॉ. विजयकुमार गावित यांनी सांगितले.