Gopichand Padalkar : अशोक खरात, रवींद्र एरंडे प्रकरणात शांत राहिलेल्या पडळकरांची 'तिसऱ्या' प्रकरणात एन्ट्री, CM' ची घेणार भेट

Nashik Crime : कायद्याचा बालेकिल्ला असलेल्या नाशिकमध्ये महिलांच्या लैगिंक शोषणाची तिसरी धक्कादायक, घृणास्पद आणि संतापजनक घटना उघडकीस आली आहे. भोंदू अशोक खरातपाठोपाठ रवींद्र एरंडेने केलेल्या महिलांच्या लैंगिक शोषणाचे प्रकार राज्यभर चर्चेत असतानाच आता शहरातील नामांकित बहुराष्ट्रीय आयटी कंपनीत काम करणाऱ्या विवाहित महिला व मुलींवर अत्याचारासह विनयभंग आणि धार्मिक छळ केल्याचा धक्कादायक प्रकार उघडकीस आला आहे.

दरम्यान, अशोक खरात, रवींद्र एरंडे प्रकरणात शांत राहिलेल्या आमदार गोपीचंद पडळकरांची या 'तिसऱ्या' प्रकरणात मात्र एन्ट्री झाली आहे. पडळकर यांनी पुणे येथे पत्रकारपरिषद घेत नाशिकमधील या प्रकारावर भाष्य केलं. पडळकर यांनी हा कॉर्पोरेट क्षेत्रात शिरकाव झालेला 'लव्ह जिहाद' असल्याचं म्हटलं आहे. अशा प्रवृत्तीविरोधात आरोपींवर 'मकोका' अंतर्गत कारवाई करावी, अशी मागणी त्यांनी केली आहे.

नाशिकमधील एका नामांकित कंपनीत गेल्या काही वर्षांपासून महिलांचे शोषण होत असल्याच्या तक्रारी समोर आल्या आहेत. नऊ पीडित तरुणींनी पोलिसांत धाव घेत तक्रार दाखल केली आहे. भरती प्रक्रियेत दबाव टाकणे, सुट्ट्यांसाठी अटी घालणे आणि सहलींच्या नावाखाली गैरवर्तन केल्याचे गंभीर आरोप केले आहेत. पडळकर म्हणाले, लव्ह जिहाद' सारखाच आता कॉर्पोरेट जिहाद समोर आला आहे. त्यात आयटी कंपन्यात कार्यरत असलेल्या उच्चशिक्षीत मुलींना लक्ष्य करुन त्यांच्यावर नियोजनबद्दपणे लैगिंक अत्याचार होत आहे. आयटी क्षेत्रात काम करणाऱ्या महिला-मुलींनी अधिक सतर्क राहण्याची गरज असल्याचं पडळकर यांनी म्हटलं आहे.

पडळकर म्हणाले, नाशिक हे आयटी हब नसले तरी तिथे काही आयटी कंपन्या आहे. पुणे हे मोठे आयटी हब आहे. आयटी कंपन्यांमध्ये असे गैरप्रकार घडत असल्यास संबधित कंपनी अधिकाऱ्यांनी त्याची पडताळणी करणे आवश्यक असल्याचं म्हटलं आहे. नाशिकमधील आयटी कंपनीत काम करणाऱ्या महिलेच्या धर्मांतराचा प्रयत्न झाल्याचं पडळकर यांनी सांगितलं.

नाशिक येथील सदर कंपनीत एकुण १३० कर्मचारी काम करतात. मात्र अत्याचार झाल्याने मुलींनी नोकऱ्या सोडल्या. मात्र ९ पीडित मुलींनी धाडस करत तक्रार दिल्याने हा प्रकार समोर आला आहे. मागच्या दोन-तीन वर्षांपासून हा प्रकार सुरु असून हे अत्यंत गंभीर असल्याचं पडळकर यांनी म्हटलं. पुण्यातील आयटी क्षेत्रातही असे रॅकेट सक्रीय असल्याचा संशय त्यांनी व्यक्त केला.

हिंदू मुलींना जाळ्यात ओढण्याचे टास्क

नाशिकमधील या कंपनीत टीम लीडर्सना टास्क दिला जात असे. ते मुलींची मुलाखत घेऊन नोकरीसाठी शिफारस करत आणि त्यानंतर त्यांच्यावर दबाव टाकत. नोकरी कोणी लावली हे सांगणे, सुट्टी देण्यासाठी दबाव टाकणे, तसेच अधिकृत कामाचे कारण सांगून मुलींना बाहेर रिसॉर्टमध्ये घेऊन जाणे व त्यांच्यावर नियोजनबद्ध लैंगिक अत्याचार केले जात असल्याचं पडळकर यांनी म्हटलं असून या प्रकरणात आरोपींवर मकोका कायद्यानुसार गुन्हा दाखल करावा, अशी मागणी आमदार गोपीचंद पडळकर यांनी केली.

मुख्यमंत्र्यांना भेटणार

नाशिकधील हा प्रकार केवळ एका कंपनीपुरता मर्यादित नसून, हे एक मोठे षडयंत्र आहे. मी स्वतः यासंदर्भात मुख्यमंत्र्यांना भेटून राज्यातील इतर मल्टिनॅशनल कंपन्यांबाबतची माहिती देणार आहे, जेणेकरून आपल्या लेकी-बाळी सुरक्षित राहतील, असे पडळकर यांनी पत्रकार परिषदेत स्पष्ट केले.