Nashik Kumbh Mela Roads : नाशिकच्या आयुक्तांना ठाकरेंच्या शिवसेनेचं थेट आव्हान; कुंभमेळ्याच्या रस्त्यांवरून पुन्हा वाद

Nashik News, 10 Sep : नाशिक शहरातील रस्ते गेल्या काही दिवसांपासून राज्यभर चर्चेत आहेत. कुंभमेळ्याच्या रस्त्यांच्या कामावरून प्रशासनावर टीका होत आहे. त्यामुळे सिंहस्थ कुंभमेळा येण्याआधीच गाजत आहे. शहरातील सिंहस्थ कुंभमेळ्यासाठी शासनाने मोठ्या प्रमाणावर रस्ते आणि विकास कामांची घोषणा केली आहे.

२७ हजार कोटींची कामे सुरू असल्याचा दावा केला जात आहे. या संदर्भात कुंभमेळा मंत्री गिरीश महाजन आणि विरोधक यांच्यात आरोप-प्रत्यारोप सुरू आहेत. या पार्श्वभूमीवर महापालिका आयुक्त मनीषा खत्री यांनी शहरातील कामांच्या गुणवत्तेवर ठाम विश्वास व्यक्त केला होता. महापालिकेच्या सर्व कामांमध्ये पारदर्शकता आणि गुणवत्ता आहे. यात दोष दाखवून दिल्यास नाव बदलेन असे आव्हान आयुक्त खत्री यांनी दिले होते.

या पार्श्वभूमीवर शिवसेना उद्धव बाळासाहेब ठाकरे पक्षाने आक्रमक भूमिका घेतली आहे. शहरातील कुंभमेळ्याच्या कामांचा दर्जा आणि कामकाज याविषयी त्यांनी प्रशासनाला पुन्हा एकदा आव्हान दिले आहे. आयुक्त खत्री यांना पुराव्यासह कामातील त्रुटी दाखवून देऊ असा दावा शिवसेना गटनेते केशव पोरजे यांनी केला आहे.

महापालिकेची आगामी महासभा याच विषयावर गाजविण्याचे संकेत त्यांनी दिले. त्यामुळे पुन्हा एकदा महापालिका आयुक्त विरुद्ध ठाकरेंची शिवसेना असे आरोप प्रत्यारोप गाजण्याची चिन्हे आहेत. शिवसेना उद्धव ठाकरे पक्षाने यापूर्वीही कुंभमेळा मंत्री गिरीश महाजन यांच्यावर गंभीर आरोप केले होते. कुंभमेळ्याच्या कामात ४० टक्के भ्रष्टाचार होत असल्याचा आरोप शिवसेनेने केला होता. विरोधात खासदार संजय राऊत यांच्या नेतृत्वाखाली महापालिकेवर मोर्चा देखील काढण्यात आला होता.

आता महापालिका आयुक्तांनी महापालिकेच्या कुंभमेळ्याच्या रस्त्यांच्या गुणवत्तेविषयी आत्मविश्वास व्यक्त केला होता. मुंबईच्या आयआयटी गुणवत्ता पथकाने या रस्त्यांची तपासणी केली. त्यात निवेदनामध्ये व्यक्त केलेल्या दाव्यांपेक्षा गुणवत्ता अधिक असल्याचे आढळले होते. याच पार्श्वभूमीवर आयुक्त खत्री यांनी कामाच्या गुणवत्तेचा दावा केला होता. मात्र त्यावरून प्रशासन विरुद्ध ठाकरेंचा शिवसेना यांच्यात वादाची ठिणगी पडली आहे.