Nashik NMC : नाशिक महापालिकेच्या सहा प्रभाग समित्यांसाठी ३० एप्रिलला निवडणूक, कुणाचा राहणार वरचष्मा, कसे आहे संख्येचे गणित?

Nashik municipal election : प्रभाग समिती सभापतिपदासाठी गुरुवारी (ता. ३०) निवडणुका होणार आहे. त्यासाठी अप्पर विभागीय आयुक्त अजय मोरे यांची निवडणूक निर्णय अधिकारी म्हणून नियुक्ती करण्यात आली असून, एकाच दिवशी सहा प्रभाग समिती सभापतींची निवड केली जाणार आहे.

महापालिकेची निवडणूक पार पडल्यानंतर महापौर, उपमहापौर तसेच स्थायी समिती सभापतीपदाची निवडणूक झाली. विरोधी पक्षनेते, सभागृहनेतेपदाची घोषणा अद्याप झाली नाही. त्यामुळे नगरसचिव विभागाने प्रभाग समिती सभापतिपदासाठी निवडणूक कार्यक्रम घोषित करण्याचा प्रस्ताव विभागीय आयुक्तांकडे सादर केला होता. मनुष्यबळाचा अभाव असल्याने सहा प्रभाग समित्याच कार्यरत राहणार आहे. दरम्यान, प्रभाग समितीवरही भाजपचाच वरचष्मा राहणार आहे. भाजपचे ७२ नगरसेवक व सत्तेत सहभागी शिवसेनेचे २६ नगरसेवक असल्याने युतीकडचे बहुतांश प्रभाग राहतील.

समित्यांवर महायुतीचा वरचष्मा

पंचवटी विभागात २४ पैकी भाजपचे २१ नगरसेवक असल्याने स्पष्ट बहुमतावर भाजपकडे सत्ता राहील. सातपूर विभागात २० पैकी १४ भाजपचे नगरसेवक असल्याने येथेही भाजपकडेच सत्ता असेल. पश्‍चिम विभागात १२ पैकी सात भाजपचे नगरसेवक असल्याने येथेही भाजपचीच सत्ता असेल. पूर्व विभागात १९ पैकी भाजपचे नऊ नगरसेवक आहेत. शिवसेनेचे चार नगरसेवक असल्याने युती म्हणून प्रभाग समितीवर सत्ता येईल. सिडकोत २४ पैकी भाजपचे १२ नगरसेवक आहेत. शिवसेनेचे सात नगरसेवक असल्याने येथेही युती म्हणून प्रभाग समितीवर सत्ता येईल. नाशिक रोड विभागात २४ पैकी शिवसेनेचे (उबाठा) १० नगरसेवक आहे. भाजपचे नऊ तर शिवसेनेचे चार असे १३ नगरसेवक युतीकडे असल्याने येथेही युती म्हणून सत्ता येईल.

असा आहे निवडणूक कार्यक्रम

विभाग वेळ

पूर्व सकाळी १० ते ११

पश्चिम सकाळी ११.३० ते १२.३०

पंचवटी दुपारी १ ते २

सिडको दुपारी २.३० ते ३.३०

सातपूर दुपारी ४ ते ५

नाशिक रोड सायंकाळी ५.३० ते ६.३०