Nashik NMC Election : मंत्री गिरीश महाजनांना अडवणं भोवलं, सिडकोतील बाप लेकावर पोलिसांची मोठी कारवाई

Nashik Politics : नाशिक महापालिका निवडणुकीच्या ३१ प्रभागांसाठी आज मतदान होत आहे. परंतु महापालिका निवडणुकीचे अर्ज नोंदणीपासून तर प्रचाराच्या शेवटच्या दिवसापर्यंत अनेक वाद-विवाद व धक्कादायक प्रकार नाशिकमध्ये घडले.

कुंभमेळा मंत्री व भाजपचे निवडणूक प्रभारी असलेल्या गिरीश महाजन यांच्या सभेदरम्यान आणि सभेनंतर नाशिकच्या सिडको भागात मोठा राजकीय गोंधळ पाहायला मिळाला. सभेत दाखवण्यात आलेल्या एका कथित व्हिडिओ क्लिपचा जाब विचारत मंत्री महाजन यांचा ताफा अडवण्याचा प्रयत्न केल्याप्रकरणी बाप-लेकासह एका महिलेवर अंबड पोलीस ठाण्यात गुन्हा दाखल करण्यात आला आहे.

नेमका विषय काय?

नाशिकमधील सिडको भागातील शिवाजी चौक येथे सोमवारी, १२ जानेवारी २०२६ रोजी सायंकाळी मंत्री गिरीश महाजन यांची जाहीर सभा आयोजित करण्यात आली होती. प्रभाग क्र. २४ मधील भाजपाच्या उमेदवारांच्या प्रचारार्थ या सभेचे आयोजन करण्यात आले होते. या सभेत भाषणा दरम्यान महाजन यांनी काही ड्रग्ज पेडलर्ससोबतची एक व्हिडिओ क्लिप जाहीर सभेत दाखवली आणि विरोधकांचे ड्रग्ज माफियांशी संबंध असल्याचा खळबळजनक आरोप केला. महाजन यांच्या या आरोपांमुळे सभेत एकच गोंधळ उडाला.

गिरीश महाजनांना आडवण्याचा प्रयत्न

सभा संपल्यानंतर मंत्री गिरीश महाजन आपल्या कारने रवाना होण्यासाठी निघाले. त्याचवेळी संशयित माधव पाटील व त्यांचा मुलगा निशांत सुनील पाटील यांच्यासह एका महिलेने महाजन यांची गाडी अडवण्याचा प्रयत्न केला. त्यांच्याविरोधात घोषणा दिल्या.

ए महाजन, आमच्या मुलांची खोटी क्लिप दाखवून खोटा प्रचार का करताय? अशी आरडाआरोड केली. महाजन यांना अडवून जाब विचारण्याचा प्रयत्न त्यांनी केला. दरम्यान पोलिसांनी महाजन यांना वाट मोकळी करुन देत महाजन यांचा ताफा निघून गेल्यानंतरही या संशयितांनी शिवीगाळ करत गोंधळ घातल्याचे फिर्यादीत म्हटले आहे.

दरम्यान पोलिसांनी दिलेल्या माहितीनुसार, सुनील माधव पाटील, निशांत सुनील पाटील या बापलेकासह एका महिलेवर गुन्हा दाखल करण्यात आला आहे. याबाबत अंमलदार केशव ढगे यांनी फिर्याद दिली आहे. सरकारी कामात अडथळा आणणे, आरडाओरड करून शांतता भंग करणे आणि मंत्र्यांच्या ताफ्याला अटकाव करणे या कलमान्वये तिघांवर गुन्हा नोंदवण्यात आला आहे.