School ID scam: धक्कादायक; धुळे शहर पुन्हा चर्चेत, शहरातूनच हालत होती कोट्यावधींच्या शिक्षण घोटाळ्याची सूत्रे; पोलिसांनी कसा लावला छडा?

School ID Scam News: विधिमंडळात गाजलेल्या शालार्थ आयडी घोटाळ्याला आता वेगळे वळण लागले. अगदी शिक्षणमंत्र्याच्या मतदारसंघाला लागून असलेल्या धुळे शहरातूनच या घोटाळ्याची सर्व सूत्रे हालत होती. आधीच बदनाम असलेल्या शिक्षण खात्याला त्यामुळे आणखी एक डाग लागला. 

शिक्षण विभागात बनावट शिक्षक नियुक्त आणि शाळांच्या मान्यता दाखविण्यात आल्या. त्यातून 160 कोटींचे अनुदान हडप करण्यात आले. याबाबत नाशिक रोड पोलीस ठाण्यात गुन्हा दाखल आहे. धक्कादायक म्हणजे या घोटाळ्याची सर्व सूत्रे शिक्षण मंत्र्यांच्या मतदारसंघाशेजारच्या धुळ्यातून हालत होती.

यासंदर्भात पोलीस आयुक्त संदीप कर्णिक यांनी उपायुक्त संदीप मिटके यांच्या नेतृत्वाखाली एसआयटी स्थापन केली होती. पथकाला शनिवारी मोठे यश आले. शालार्थ आयडी घोटाळ्याचा मास्टर माईंड प्रशांत वाडीले याला धुळे येथून अटक झाली. 

प्रशांत वाडीले याचे धक्कादायक कारनामे पुढे आले आहेत. शिक्षकांच्या बनावट नियुक्त्या आणि शाळांना मान्यता नसताना जुन्या आदेशांचा दुरुपयोग त्याने केला. साठी शिक्षण विभागाची वेबसाईट हॅक करण्यात आली. 

प्रशांत वाडीले याच्या कागदोपत्री ५४ शिक्षण संस्था आढळले आहेत. तो ६५ आश्रम शाळांचा सर्वेसर्वा आहे. त्यातून त्याने शेकडो शिक्षकांना बनावट नियुक्तीपत्र दिले. त्यामधून राज्य शासनाचे 160 कोटींचे अनुदान हडप करण्यात आले. आश्चर्य म्हणजे संशयीत केंद्रीय राज्यमंत्री रामदास आठवले यांच्या रिपब्लिकन पार्टी ऑफ इंडियाच्या शिक्षक आघाडीचा जिल्हा प्रमुख आहे. 

अटक केलेल्या श्री. वाडीले याच्या साक्री आणि शिंदखेडा येथे दोन शिक्षण संस्था आहेत. तेथे विनाअनुदानित शाळा आहे. प्रत्यक्षात बनावट कागदपत्रांचा वापर करून त्याने असंख्य शाळा आणि संस्था काढल्या होत्या.

नाशिक पोलिसांच्या अधिकाऱ्यांच्या विशेष पथकाने शनिवारी पहाटे चारला वाढिले गाढ झोपेत असताना त्याला ताब्यात घेतले. या घोटाळ्यात अटक झालेला तो चौथा आरोपी आहे. यासंदर्भात पोलिसांनी यापूर्वीचा अकरा हजार पानांच्या आरोप पत्र न्यायालयात दाखल केले आहे.

-----