NCP Sharad Pawar: छगन भुजबळांच्या मतदारसंघात जाऊन राष्ट्रवादीचे नेते म्हणावे, ‘आमचा पराभव ईव्हीएम मुळेच’

EVM Controversy in Nashik: राष्ट्रवादी काँग्रेस शरदचंद्र पवार पक्षाने मंत्री छगन भुजबळ यांच्या येवला मतदार संघात बैठक घेतली. त्यावेळी त्यांनी अतिशय धाडसी राजकीय विधान केले. त्यामुळे ही बैठक चर्चेचा विषय ठरली आहे.

राष्ट्रवादी काँग्रेस शरदचंद्र पवार पक्षातर्फे येत्या येत्या आठवड्यात नाशिक शहरात शक्ती प्रदर्शन केले जाणार आहे. त्याची जोरदार तयारी सध्या पक्षाच्या पदाधिकाऱ्यांकडून सुरू आहे. त्यादृष्टीने जिल्ह्याच्या प्रत्येक मतदारसंघात कार्यकर्त्यांच्या बैठका होत आहेत. या बैठकांसाठी पक्षाचे नेते सक्रीय झाले आहेत.

अन्न व नागरी पुरवठा मंत्री छगन भुजबळ यांच्या येवला मतदार संघात माजी आमदार सुनील भुसारा यांच्या उपस्थितीत राष्ट्रवादी काँग्रेस शरदचंद्र पवार पक्षाची आढावा बैठक झाली. यावेळी भुसारा यांनी आमचा पराभव मतदारांकडून झालेला नाही. मतदान यंत्रांमुळे आमचा पराभव झाला, असा दावा केला.

यावेळी माजी आमदार भुसारा यांनी मंत्र्यांचा पराभव करणे फार अवघड नसते, असे सूचक विधान केले. कार्यकर्त्यांनी मरगळ झटकून येत्या नगरपालिका आणि महापालिकेच्या निवडणुकीच्या तयारीला लागावे. राज्य सरकार आपल्याच कामकाजामुळे टिकेचे धनी झाले आहे. त्याचा फायदा आपल्याला होईल असे सांगितले.

राज्यातील महायुतीचे सरकार हे जनतेच्या मनातील सरकार नाही. ईव्हीएम या मतदान यंत्राच्या झोलमधून निर्माण झालेले हे सरकार आहे. हे सरकार आपल्याच दुष्कृत्यांमुळे अडचणीत आले आहे, अशी टीका माजी आमदार भुसार यांनी केली.

महायुती सरकारला धडा शिकविण्यासाठी राष्ट्रवादी काँग्रेस जनतेच्या प्रश्नांवर आवाज उठवणार आहे. सप्टेबर महिन्यात निघणाऱ्या मोर्चात कार्यकर्ते आणि नागरिकांनी मोठ्या संख्येने सहभागी व्हावे. माध्यमातून महायुती सरकारला आणि केंद्रातील शेतकरी विरोधी सरकारला धडा शिकविण्याची संधी आहे.