Prajakta Mali News: बीड प्रकरणामुळे वादात सापडलेल्या प्राजक्ता माळी यांना दुसरा धक्का बसला आहे. महाशिवरात्रीच्या पूर्वसंध्येला त्र्यंबकेश्वर ज्योतिर्लिंग मंदिरात शिवपार्वती विवाह होणार होता. हा कार्यक्रम वादाच्या भोवऱ्यात सापडला होता.
नाशिकच्या त्र्यंबकेश्वर मंदिराच्या आवारात शिवपार्वती विवाह सोहळा होणार होता. या धार्मिक कार्यक्रमात मंदिराच्या विश्वस्तांनी दूरचित्रवाणी वरील अभिनेत्री प्राजक्ता माळी यांचा शास्त्रीय नृत्य कार्यक्रम ठेवला होता. मात्र अभिनेत्रीच्या नृत्य कार्यक्रमाला स्थानिक नागरिक आणि माजी विश्वस्तांनी प्रखरविरोध केला होता.
संदर्भात मंदिराचे विश्वस्त मंडळ मात्र अभिनेत्री माळी यांचे शास्त्रीय नृत्य कार्यक्रम ठेवण्याबाबत आग्रही होते. या संदर्भात विश्वस्त मंडळाने ठराव देखील केला होता. मात्र हा वाद थेट पोलिसांपर्यंत पोहोचल्याने त्याबाबत विविध मतप्रवाह तयार झाले होते.
मंडळाच्या सचिव आणि नगरपालिकेच्या मुख्य कार्यकारी अधिकारी यांनी त्या कार्यक्रमाचे समर्थन केले होते. मात्र यावर जाहीर वाद विवाद सुरू झाल्याने प्राजक्ता माळी वादाच्या भोवऱ्यात सापडल्या होत्या. संस्थेच्या माजी विश्वस्त ललिता शिंदे यांनी याबाबत तीव्र आक्षेप घेतला होता.
त्र्यंबकेश्वर मंदिर हे केंद्रीय पुरातत्त्व विभागाच्या अधिपत्याखाली कार्यरत आहे. त्यामुळे मंदिराच्या आवारात कोणत्याही ऍक्टिव्हिटी करायच्या असल्यास केंद्रीय पुरातत्व विभागाची परवानगी बंधनकारक आहे. पुरातत्त्व विभागाने प्राजक्ता माळी यांच्या कार्यक्रमाला परवानगी दिली नाही, असा दावा श्रीमती शिंदे यांनी केला होता.
महाशिवरात्रीला हजारो भाविक त्र्यंबकेश्वर येथे मंदिरात दर्शनासाठी येतात. या गर्दीवर नियंत्रण ठेवणे एक मोठे आव्हान असते. या पार्श्वभूमीवर मंदिराच्या आवारात कमी जागा असतानाही शास्त्रीय नृत्याचा कार्यक्रम ठेवण्यात आला होता. तो धार्मिक कार्यक्रमापासून वेगळा आहे, असा दावा श्रीमती शिंदे यांनी केला होता.
या संदर्भात त्यांनी जिल्हा पोलीस अधीक्षकांची देखील संपर्क केला होता. या कार्यक्रमामुळे भाविकांना विविध अडचणींना सामोरे जावे लागेल. त्यातून कायदा आणि सुव्यवस्थेचा प्रश्न निर्माण होऊ शकतो, असा दावा माजी विश्वस्त ललीता शिंदे यांनी केला होता. त्यानंतर महामंडलेश्वर सूर्यदास आणि प्रहार जनशक्ती पक्षातर्फे देखील प्राजक्ता माळी यांच्या कार्यक्रमाला विरोध करण्यात आला होता.
हा कार्यक्रम झालास धार्मिक परंपरा खंडित होतील, असा दावा करण्यात आला होता. या पार्श्वभूमीवर बीड प्रकरणाने चर्चेत आलेल्या अभिनेत्री प्राजक्ता माळी यांना बॅकफूटवर जावे लागले. वाढता वादविवाद लक्षात घेता माळी यांनी कार्यक्रमाच्या पूर्वसंध्येला आपण संबंधित कार्यक्रमाला उपस्थित राहणार नाही अशी घोषणा केली. त्यामुळे एक नवा वाद निर्माण होण्याआधीच शमला.
-------
२५ वर्षे पूर्ण करणारा ई-सकाळ आता कॉमस्कोअरमध्ये Number One डिजिटल माध्यमांच्या क्षेत्रातील नवी झेप
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.